Auleria Wakudumo
OUTAPI – Selma Asino wongudu yoSwapo okwa findana po omahoololo oukansela koshikandjohoololo shaUtapi a ningwa Omaandaxa. Asino okwa udaneka oshiwana shaye kutya otaka kala omupiya washo, okukwafa aveshe moshikandjohoololo shaye.
“Ohandi ka kala omukwateli komesho wavo nomuudi womakemo avo aveshe. Ohandi ka kala yo omuleli ehena okatongo nokuyambula po oshikandjohoololo shetu,” Asino ta ti.
Kansela mupe okwali ta kondjifafana naFillemon Shikwambi wongudu yoIndependent Patriots for Change (IPC). Shikwambi okwali nale kansela waUtapi okudja mo2025 fiyo omo2020 ali a kalela po ongudu yoSwapo.
Asino okwa findana omahoololo oukansela nomawi 9 675 omanga Shikwambi a dja mo nomawi 669. Omahoololo okwa ningwa koshikandjohoololo shaUtapi sha landula eshi oo ali nale kansela mukulu, Immanuel Shikongo a ulikwa a ninge ngoloneya woshitukulwa shaMusati kOmupresidente Netumbo Nandi- Ndaitwah.
Ovanhu 26 400 ova li veli shangifa oukalata vomahoololo kOutapi, ashike ovanhu 10 425 ovo va kufa ombinga mokuhoolola. Eembapila 81 oda ekelwashi eshi ovahoololi inava landula omilandu dokuhoolola. Omukulunhu wokakomisi komahoololo moshitukulwa shaMusati Elizabeth Shiningayamwe okwa holola kutya omahoololo okwa enda nawa.
Shiningayamwe okwa ti ova hovela omahoololo okudja po07h00 novakwashiwana vamwe ova ya momikweyo nale okudja po06h00.
“Eshi otashi holola kutya ovakwashiwana ovali veli longekida okuyandja omawi avo komuhoololwa oo va hala,” Shiningayamwe ta ti. Shiningayamwe okwa holola kutya okakomisi komahoololo okali ka longekida eenhele domahoololo adishe nokuhoolola okwa kwata ashike oule wominute inadi fika punano keshe momunhu.
“Eenhele domahoololo odali 42, mbali odali omobile, hano ovayakuli ovo hava kala ponhele oule wefimbo omanga inava ya konhele ikwao okukwashilipaleka kutya omayakulo okwa ya popepi noshiwana,” Shiningayamwe ta fatulula.
Shiningayamwe okwa fatulula yo kutya kansela mupe otaka kala mombelelwa oule womafiku 52 nota ka kufa natango omhito momahoololo oukansela oo taa ka ningwa oshilongo ashishe.
Umwe vomovahoololi, Maria Nangolo okwa holola kutya okwa kwata oxuxwa komulungu opo euye a hoolole shaashi ina hala okuka la momutenya ngeenge kwa shi. Okwa ti, inashi mu pula efimbo lile okuhoolola. Iipupa Shaanika, naye umwe vomovahoololi mOutapi okwa ti okwa eta ounona vaye ovo va hoolola lwotete omahoololo oukansela.
Shaanika okwa ti ounona vaye ineya fiya meumbo shaashi okwa hala okuva longa nghene shili sha fimana okuhoolola nokukala ushi kansela woye oo teku etele elunduluko momudingonoko woye.
Kansela mupe okuli yo oye ngoloneya welelo lodoolopa yaUtapi.
-wakudumoauleria@gmail.com