Taimi Haihambo 

Omulongwa womoshiputudilo shaValombola Vocational Training Center, Immanuel Nathanael mOngwediva moshitukulwa, oye a findana po omafiyafano oNational world skills competition neudo moNamibia aishe. 

Nena opamwe nosheendo shovakufimbinga vomofikola yavo, ova ningilwa etambuleko lonomena wina mofikola yavo, eshi va aluka komafiyafano. 

Nathanael okwa hololela Kunduna ehafo laye nghee avena ombadi yoshingolodo, ekopi oshoyo oN$35000. 

Nathanael okwa kufa ombinga mokutunga, opo eya pondodo yotete, oshoyo omufindani dingi momafiyafano aeshe. 

“Eshi edina lange laifanwa mee saala daSwakopomund kutya aame omufindani dingi, onda ngwangwanapo manga kashona shaashi kandali ndeshiteelela,” ta ti. 

Okwa twikila kutya, kwa tula ofikola yavo oshoyo oshitukulwa pombada, okwa hepulula eenghono dovahongi oshoyo ovadeuli vaye , oshoyo aveshe ava vali vena eli neekelo muye. 

Nathanael okwa twikila kutya yee nghee adja okwa kala ehole okutunga, yee vati taka mbekulwa kumushiinda shaye umwe, oo naye elihongela oku tunga, shoo osho shemufininika akufe ombinga momafiyafano oludi eli. 

Philip Shitenio o ali omudeuli waNathanael, opo aka kufe ombinga momafiyafano okwa ti Nathanael oshiponga nai nghee akala temu deula. 

“Okwa kala lela ena ohokwe pefimbo lomadeulo etu naye, nonda tameka oku kala handi mudeula okudja 2024 muJanuali, fiyo taka kufa ombinga momafiyafano neudo. Oshili ondi udite nawa neenghono shaashi eenghono dange ina dihepa, yee omunafikola ou okwa kalelapo ofikola nawa,” ta ti. 

Mongudu yovafindani omuna yoo Velemina Amadhila oo naye akufa ombinga mokuhondja, nokwa findana omambadi yoshingolodo, oshoyo oN$15000. 

Omufindani dingi okwa teelelika aka kufe ombinga natango momafiyafano oludi eli, ko Shanghai, China, muSepetemba 2026. 

Nathanael okwa twa ovanyasha vakwao omukumo ava vena ondjodi yafa yaye vaha sholole, ndele vapule komesho mukeshe shimwe eshi tava dulu. 

taimihaihambo2000@gmail.com