Iheka Edwin Kanguatjivi nambano ma rarakana okarukondwa komatoororero ka Tjombinḓe.
Mo Popular Democratic Movement, ousupi OPDM, momatoororero wombura ndji woutukondwa nozongomainde mu Tjikukutu. Kehi yeningira rotjira otjini tji tja zeri kutja arire motjira ngwarire omukekwa watjo erike nokuhina omupirure. Motjikara ku noukambe oukwawo tjimuna Ngajoo Mbuende ngu me rikuramene; Wenzel Kavaka nai orata yokarukondwa inga na Kueekuje Kazapua wOswanu.
Mo 2020 Kavaka wOswapo ongwa taara nomaraka o-911; outjavari o Bethuel Mbuende wOswanu nomaraka o-685; Hijangoro wOlandless People’s Movement (LPM) nomaraka o-390; Werner Kambato wOnudo nomaraka o-326; Elizabeth Kamboua nomaraka o-152; Katjanaa Kaurivi omurikuramene nomaraka o-131 na Otniel Kurangera wina omurikuramene nomaraka o-124.
Kanguatjivi me rikwizikire okurwisa ozongatukiro zoveta zopokati komahi omararanganda mu mu nourunga wovinamuinyo okarukondwa komatoororero ka Tjombinḓe tjinga ake haṋasana omukoka pokati ka Namibia nehi eraranganda na Namibia indi Otjauana ovinamuinyo pokati komahi ayeevari nga amu nyonḓorokisirwa ovinamuinyo i yomarunga wovinamuinyo.
Wina wa tanda okupwisa oviungurisiwa vyomahakayenisiro nokutja Ovakuruha ave ha sewa pendje nomananeno worukondwa. Ma rwire omekurisiro woviungurisiwa mOkarukondwa tjimuna otuveze twomanyomokisiro wozongetjesa, ozondjira novivasise vyomeva kotjiwaṋa.
Kanguatjivi wa tanda okukurisa otutumbo novikunwa; ozopereisa nḓa pwire ovinamuinyo nomananeno omakohoke nge hi na oviundikwa nu womondjerera noruhaera. Mo 2004 Kanguatjivi wa rarakanene ourata wokararukondwa nga kehi yOnudo. Ma tja ozombura ape o-21 kombunda ya nao ma munu kutja ngunda Okarukondwa nga kamu ya kara omekurisiro wotjivara.
Otji ma munu kutja ma roro rukwao okutara kokutja tjii hapo otjikando tji ovatoorere ngunda mave panḓere povira imbi mbya rora nu ngamba kavi ya yeta omarundurukiro wevara.
Ma munu kutja OPDM nai o ndji nonḓikameno momananeno nounane wayo nu ihi itjimwe tji tje mu pe ombango okuyakura kutja ma rire omukekwa wayo kokurarakana okarukondwa nga momatoororero nge ri ko mu Tjikukutu.