Omukulunhuwiliki wouhaku koshitukulwa shaMusati Alfons Amoomo okwa ti okwa ninga omalongekido okulongulula oupangelo va kulupa, va yooloka oshoyo okutunga omalukalwa ovapangi. 

Okwa ti oshitukulwa shaye oshi na oipangelo ine, omandiki ouhaku aahamano noshoyo oupangelona ve li 42. 

Omwaalu wovanhu 330758 ohava mono omayakulo ouhaku moshitukulwa. 

Okwa yelifa ta ti ngeenge ta shi ya pomayakulo ouhaku oshitukulwa shaye otashi endifa nawa okukwashipaleka kutya oshiwana oshi li popepi noupangelo. 

Amoomo okwa ti neudo ombelewa yaye oye shipondola okulongulula okapangelo koTsandi molwashi okwa li ka kulupa unene. 

“Okapangelo oka longululwa kongushu yoshimaliwa oN$487859.03. 

Okwa hokolola ta ti koshipangelo shaKahao osha longululwa ngaashi keesaala dovakainhu novalumenhu. 

Okwa weda po ta ti okanyofi koshipangelo shaKahao na ko oka longululwa noke li paife monghalo iwa. 

“Onduda yokombifa koshipangelo shaUtapi oya longululwa shaashi okwa li ya kulupa,” ta ti. 

Okwa yelifa ta ti kokapangelo Onamatanga ota ku tungwa omaumbo ovapangi molwashi okwa didilikwa ovapangi hava ende oshinano shile okuya koilonga. 

Okwa weda po ta ti eshongo lokuhe na omalukalwa ovapangi ota li dana onghandangala ya kula. Kombinga ikwao, Amoomo okwa popya ta ti omivalu dovanhu tava kwatwa komalaria oda shuna pedu moule weemwedi mbali da pita. 

“Ohatu twikile okulwifa omukifi womalaria oshoyo okuyandjaneka ovanambelewa vouhaku opo va ka pombele komaumbo,” ta ti. 

fhamalwa@nepc.com.na