Omutambo Gwomawe – Oshigwana okupitila mooradio oshowo komalungula otashi pula sha hala okukayambindhidha okudhima omulilo ngoka tagu tsikile okufika komahala ga yooloka moshitopolwa shaMusati.
Olyomakaya okwa lopotwa omulilo tagu fike shinyanyaleka momukunda Olumelengwa momindhingoloko gOkahao omanga mEtosha moka gwa tamekele gwa pondolwa okudhimwa thiluthilu.
Omulilo ngoka gwa tamekele momasiku 22 gaSepetemba tagu fike, ogwa fekelwa gwazi pehala mpoka ha pu ndulikwa omakala.
Ngoloneya gwoshitopolwa shaMusati Immanuel Shikongo sho ayi moonkundatha noshifokundaneki shika Olyomakaya okwa ti omulilo onkene tagu tsikile okufika.
“Kapena iyenditho ya gwana okufala oshigwana hoka taku pi, oshoka oko kule noonkondo, ashike mboka yena ehalo lela otaya vulu okwiinyolitha se tu kambandhale niiyenditho mbyoka yili po,” ta ti ngaaka. Shikongo okwa indile wo moshigwana mboka yena iiyenditho tayi vulu okuthika hoka kuna omulilo opo ya yambindhindhe okututa aantu oshoka otaya nyengwa.
Shikongo okwa ti omulilo ogwa mbugaleka tagu thigi aanafalama muupyakandhi wuulithilo.
“Nonando kwa pumbiwa oshigwana shika yambindhindhe, okwa longekindhwa aanambelewa okuza kuuministeli wa yooloka oshowo etanga lyegameno opo ya yambindhindhe okudhima omulilo,” ta ti ngaaka.
Shikongo okwa popi kutya ethimbo ndika omulilo ohagu taandele mbala kombepo omolwa omwiindhi ngoka gwa kukuta.
Omunambelewa omukuluntu gwomakuti muuministeli womindhingoloko Jonas Mwiikinghi okwa ti uufudhayela owo uupyakandhi unene.
“Onkene omulilo nguka ita gu hulu paife. Sho ngaa pehala limwe ta pu dhimwa po pamwe ota pa tema omolwa uufudhayela mboka,” ta ti ngaaka.
Ta fatulula kutya uufudhayela ohau holoka unene pomahala mpoka papya omulilo.
Uuministeli womindhingoloko iixwa nomapashiyono owa ti kutya oohekta dhili kondje yEtosha 177 631 noohekta dhili 171 098 meni odha pi komulilo omanga oohekta dhili 14 783 muninginino mbangalantu wEtosha nadho dha pi po.
Okwa kumagidhwa wo aatalelipo yeli popepi nomahala ngoka ga fikwa opo yaaye popi nomulilo oshoka oshanika oshiponga, ta gwedha po kutya omulilo ohagu vulu okulundulula hoka guuka mbala. vkaapanda@nepc.com.na