KATIMA MULILO – Mapokola hakuna yeba tamile mwa piho ya bulengwami yene ezahezi Labune, kwa siteshini sa kunwisa mafula sa Kamunu village kanako ya 04:00 kasasana. Teñi baana babalalu bane bashimbile litobolo nebakeni mwa sintolo nikukala kukunupa fafasi, lilumo leliñwi la nata malonda wa musali yanali famusebezi kwa liutu.

Babakulubelwa kiha bazwelapili ku uzwa sibulukelo sa masheleñi mone kuna ni masheñi akuma fa N$ 18 949. 70. Sibulukelo sa masheleñi sa sipi nesi ilo fumanwa mabapa ni komponi ya Shack Dwellers, ni masheleñi alikana feela N$55.20.

 Mapokola neba londotile mutala wa mautu one ufumanwi fasibaka sa kezahalelo, mi noliba kwa komponi ya Makaravani ya Wiko. Lipatisiso za mapokola lizwelapili. Mwapiho yeñwi, yakulubelwa kuba lisholi nakunupilwe kwa lizoho ni kwa liutu kwa sibaka sa Juda Haus Lodge kwanda tolopo ya Katima Mulilo, kali kakalezo za kuli nabata kutuba ni kuuzwa.  

Nabonwi kimuña sibaka ili yana mukunupile. Mapokola nebakile babizezwa kwateni. Yakulubelwa atamiwa niku isiwa kwa sipatela sa Katima Mulilo. Ulibelezwi kubonahala mwa khuta ya sikiliti kachenu. Mwapiho ye shelana, situpu sa musali wa lilimo zelishumi kazelobapeli, yana tibile Labutanu manzibuana, hana tapa mabata ni sibaka sa Waterfront ni minshini ya NamWater, nesi fumanwi Lasabata manzibuana. Nazibahalizwe kuba Chikwata Lielezo mi bahabo neba lemusizwe. Lipatisiso za sipokola lizwelapili.