Taimi Haihambo

Kansela woshikandjohoololo shaGongo, moshitukulwa shaMusati Daniel Iilende okwa hafela oilonga younafaalama tai longwa kovakalimo moshikandjohoololo shaye.

Oshivike sha dja ko Iilende okwa talela po ovanafaalama mOgongo, ta tale nghee tave shi endifa.

Iilende okwa ti elalakano letalelepo laye, okwa li okuuda omakemo ovanafaalama ngeenge tashi ya keemhumbwe davo, omawedelepo osho yo ehongo opamwe nounongo u na sha nounamapya.“Pefimbo letalelepo lange, eshi nda mona osha hafifa nge neenghono. Eembuto edi hatu yandje okudilila pombelelwa yange, osho yo oikwa noipangifo ihapu ya tulwa moilonga,” ta ti.

Ota ti nonande moshikandjo mu na ava ve na onyalo younamapya, vahapu vati otave shi endifa nawa lela.

“Oshili eemhito doilonga oda pumba, ashike ovanhu vahapu kombinga oku ove likongela oilonga yavo kuvo vene, mokuninga oikunino yoingumutulu noihape apa naapenya, vo va ka landife,” ta ti.

Iilende okwa twikila kutya metalelepo laye okwa ninga yoo omapekaapeko e na sha nomeva moshikandjohoololo.

“Ngeenge tashi ya pomeva okunwa noku tekela oimeno, vahapu natango ove li mo nawa shaashi ova kalela okanaala komeva, vo ava ve li kokule nokanaala komeva ova xupa omatale nomifima,” ta ti.

Iilende okwa ti nonande vahapu tave shi endifa nawa mounafaalama, okwa ti ope na ngoo ava va pumbwa omakwafo ngaashi eembuto dokukuna osho yo oilongifo younafaalama.

“Ohandi pula Ombelewa yOmupilima ikwafele apa tai dulu. Ame natango ohandi pula ovanafaalama va twikile nokulonga noudiinini opo va dule okulipalufa vo vene,” ta ti.

-taimihaihambo2000@gmail.com