Auleria Wakudumo 

Ehangano lokufutila ovalihongi koiputudilo yopombada loNamibia Students Financial Assistance Fund (NSFAF) ola holola kutya ouyelele oo wa li wa pitifwa kepandja lavo komalungula owa pitifwa papuko. 

Molopota ya pitifwa kehangano, NSFAF okwa ti epandja lavo lokomalungula inali liteyelwa keengangala ngaashi oshiwana sha li tashi fekele, ndele ova ninga epuko mombelewa yavo osho sha eta ouyelele wovahongwa vamwe u tulwe komalungula. 

“Ohatu kwashilipalekele ovalihongi, oikondo ya yooloka oyo hatu longo nayo osho yo Namibia alishe koonono kutya NSFAF ota twikile okuamena ouyelele woohandimwe ovo tava longifa ile va longifa ehangano letu,” NSFAF ta holola. 

NSFAF okwa holola kutya okwa li tava kendabala okutula komalungula etumwalaka olo la kwatela kumwe ouyelele wovalihongi uhe li mondjila. 

NSFAF okwa holola yo kutya etumwalaka ola kufwa ko meendelelo ndele epuko eli la li la ningwa tali pukululwa. 

“Otwa katuka onghatu yopombada okukwashilipaleka kutya epuko la ningwa itali endululwa luvali. NSFAF ota twikile yo okuamena ouyelele wovalihongi ovo tava mono ekwafo lopashimaliwa kuye,” ta kwashilipaleke ngaho. 

-wakudumoauleria@gmail.com