Taimi Haihambo
ONGWEDIVA – Elizabeth Paulus, oo e li enyakwa mokuwapeka oipala nomeikapa okwa ti onghalamwenyo inai xula eshi ina mona omhito yokuya koshiputudilo shopombada nokulihongela eifano laye e li a li a hala ngaashi vamwaina.
Paulus ou e li omukalimo womOngwediva okwa ti ounongo waye wokufaneka owe mu kufa koshi, nowe mu pa eifano laye lokupainda oipala yovanhu, osho sha shiivika nawa ongomake-up.
Paulus okwa ti okwa putukila puvamwaina vahamano ashike vo inava dja mepata liyamba, na ina okwa kala he va lombwele kutya nava fimaneke okulonga noudiinini, vo ve lipake alushe mwaasho ve hole.
“Onda ka twikila elihongo lange kosekundofikola kEheke, oko nda ka wila mohole nokupainda osho yo okufaneka. Onda ka kala yo andi kala nda mbekulwa kovanhu ava hava kala moikulanda va paindwa moipala nonda kala ndi na ehalo loku shi ningila moshipala shomunhu,” ta ti.
Konima vati okwa kala ha painda oipala yavamwaina neefelende daye, yo oilonga yaye opo ya ka tamekela.
Vati eshi a enda ta kulu oinima nayo oya ka tameka tai shendje, nonghalamwenyo oye mu fininika a ka tameke oilonga yomeembelelwa.
“Oilonga yoludi eli kaya li lela hai hafifa nge, nohandi lihaluka ashike handi shuna kokupainda oipala yovanhu natango,” ta ti.
Okwa ti eshi oshe mu fininika a fiye po oilonga yomombelelwa ndela ta waimine ondjila yaashi e hole.
Nena Paulus oye umwe womovambabeki voipala dingi mOngwediva, nokwa shiivika nawa nedina “Makeup by Queen,”.
Okwa ti ongeshefa otai mu endele nawa, noshimaliwa shaye shakula ohashi mu dile unene moitufi yeehango, naikwao ihapu ya wedwa po, osho yo ovanhu vahapu ava have ya peumbo laye va hala okuwapalekwa, shaashi okwa patulula ostudio yaye peumbo.
Okwatwikilakutya, omashongo aa ha taalele unene eekastoma daye ngeenge tadi nyenyeta kutya kadi hole oilonga yaye. Shikwao natango vati ope na ngaho efimbo limwe hapu kala pehe na eekastoma, ashike efimbo olo oha kendabala e li pake moilonga yaye ikwao yopaumwene.
Okwa twa ovanyasha ava ve na ondjodi osho yo ehalo lokuwaimina ondjila ya fa yaye, vaha sholole ndele va longe noudiinini.
-taimihaihambo2000@gmail.com