Ombelewa yOmupresidente oya pitifa omukanda tau ti kutya mokavidio ke li komalungula omo vati ta xwaxwameke elongifo loshimaliwa moshilongo okoipupulu. 

Oshiwana osha kumaidwa opo shiha landule vali omahokololo oipupulu taa tulwa komalungula. 

Otaku hokololwa kutya okavidio ota ka yandjanekwa komapandja okomalungula a yooloka ngaashi koFacebook osho yo koTik-Tok omo taka holola Omupresidente ta lombwele oshiwana shi kale tashi pungula oimaliwa pamukalo woNamibia AI. 

Mokavidio otamu tongwa kutya omunhu ngeenge okwa pungula oshimaliwa shi fike N$2 783 ota ka mona N$4 300 notashi pula vati ovakufimbinga vaheyali. 

Onghela omupopiliko keumbo lepangelo Jonas Mbambo okwa yelifa ta ti Omupresidente Netumbo Nandi-Ndaitwah haye shili a popya mokavidio taka tandavele komalungula. 

“Okavidio oko otaka pukifa oshiwana oshoyo okuulika efano lii kombinga yOmupresidente wetu,” ta ti. 

Mbambo okwa yelifa ta ti Omupresidente ke na efiku a kufe ombinga moinima yoludi eli onghee kashi shi shoshili. 

Okwa ti ombelewa yOmupresidente itai popile ovanhu tava longifa nai omalungula shaashi osha puka. 

Okwa kumaida oshiwana opo shi kale kokule nokulongifa omafano ovanhu nokutandaveleka ouyelele woipupulu komapandja okomalungula. 

Mbambo okwa ti omauyelele oipambele yomombelewa yOmupresidente ohaa yandjwa pambelewa osho yo okutulwa komapandja opamalungula kovanailonga tava longele keumbo lepangelo. 

-fhamalwa@nepc.com.na