WINDHEOK – Kakukutu komatanga opolifi Inspector General Joseph Shikongo okwa ti ovanangeshefa hava landifa omalodu nava fye oshisho kutya ove na omikanda ngaashi oveta tai ti. Edi okwe di popya pefimbo loshikonga shokukelela oimbuluma osho sha ningwa Etitano moWindhoek. 

Ovanambelewa vopolifi pamwe nakakukutu kopolifi Shikongo okwa li tava ende momalukanda a yooloka okuninga oshikonga showina shokukandeka oimbuluma. Efiku olo ovapolifi okwa li va topolelwa komalukanda oko tava ka ninga oikonga okukelela oimbuluma. 

“Oshikonga eshi osha fimana notashi twikile molwaashi otashi kwafele okushunifa oimbuluma pedu moWindhoek,” ta ti. 

Okwa weda po ta ti osha fimana opo oshiwana shi longele kumwe nopolifi pefimbo loshikonga eshi osho yo okuyandja ouyelele kombinga yoimbuluma tai ningwa momidingonoko davo. 

Okwa ti ovapolifi otava twikile okulonga nondjungu okukaleka po eameno noshiwana nokutula po elandufano moshilongo. 

Shikongo okwa yelifa ta ti opolifi oya didilika ovanhu hava lopota oibofa kwa laata osho shi li eshongo linene la taalelwa kovapolifi. 

“Ovanhu nava lopote oibofa pefimbo molwaashi otashi kwafele opolifi i kale ya ninga omakonakono noupu,” ta ti. 

Natango, Shikongo okwa lombwela oovene veendingosho opo va kotokele omaweelelo eengelema domeendingosho unene tuu pefimbo lovanafikola tava shange omakonakono. 

-fhamalwa@nepc.com.na