Opolisi moshilongo oya kumagidha oshigwana shi kale sha kotokela ootaksi taya londo oshoka yamwe kaye li moshili, ihe oombudhi.

Opolisi moshilandopangelo okupitila mepeko lyopolisi oya ti ootaksi odhindji ohadhi adhika noombele onene osho wo omikonda ya ningila okuyuga aafaalelwa.

“Kotokeleni ootaksi, oyendji itaya felefula moshili, ihe oya hala ashike okuyuga aantu iinima yawo,” ya kumagidha ngaaka.

Moshiningwanima shimwe oshitalala aanyasha yaali oya li ya ponokelwa komushingi gotaksi koWindhoek, konima kwa li ye mu lombwele kutya hoka a uka hako ya pula ya falwe.

Omukuluntu gopolisi moshitopolwa shaShana Naftal Lungameni Sakaria naye okwa kumagidha oshigwana shi kotokele ootaksi sho shi londe ndhoka dhi na omandhindhiliko ngoka taga vulu okulandulwa kopolisi uuna pwa holoka sha.

Sakaria ndhoka okwa li e dhi popi sho a li a pulwa a tye ko sha kootaksi dhiifundja ndhoka tadhi yugu aantu iinima yawo.

“Otwa lopotelwa oshigwana tashi yugwa iinima yawo ngele taya lefa ootaksi. Ootakisi ondhindji kadhili moshili onkene aafuthi otaya longitha ompito ndyoka okuyuga oshigwana omaliko gawo,’’ ta ti ngaaka.

Aantu oyendji miitopolwa yokonooli, inaya mangulukila we okulonda ootakisi omolwa aafuthi mboka taya longo onga aahingi yootakisa, nelalakano lyokuyuga oshigwana.

“Oshigwana nashi kale aluhe sha kutha ko uuyelele awihe tango omanga inaaya londa , mboka tu vulu okulongithwa kopolisi, oshoka olundji ohaya longitha oonomola ndhiifundja,’’ ta kumagidha ngaaka. 

Oondoolopa dho mo nooli Ondangwa, Oshakati nOngwediva odha lopotwa ndhina aafuthi taya longitha oompito adhihe okuyuga oshigwana iinima yawo.

Okwa konekwa ootakisi hadhi tulwa oonomola dhiifundja konima, inaadhi fathana nadhoka dhokomeho, ya ningila okwaamangwa uuna ya longo iilonga inayi uka.

-vkaapanda@nepc.com.na