Osikola Nangolo Mbumba moshikandjohogololo Okongo oya kanitha aalongwa yaali yomimvo 16 yiikutha oomwenyo moomwedhi ashike heyali dha piti po kati.

Sha ikolela kepeko lyopolisi lyiiningwanima ya holoka mehuulilo shiwike, olutu lwaNdafelai Nghipangelwa olwaadhika lwa endjelela momuti ongula yEtitano komukunda Omboloka koshitopolwa shaHangwena. 

Omukuluntu sikola koNangolo Mbumba Lazarus Shapwa okwa koleke kutya omulongwa sikola Nghipangelwa gwomimvo 16 okwa ikutha omwenyo sho a imangeleke eshi ningi ashike oomwendhi heyali dha piti po sho kuume ke gwomimvo 16 naye a imangeleke nuumvo.

“Aalongwa mboka yaali oyali mongulu yimwe no ya kala ookuume, ihe se onga aalongi yawo ina tu kala twa ndhindhilika sha tashi limbilike momayihumbato gawo,” ta popi ngaaka. Shapwa okwa ti omaikutho goomwenyo gaanasikola mboka oga limbilike noku shololitha aalongwa posikola, onkene oya yi moonkundathana nomukuluntu gwelongo moshitopolwa, opo ya etelwe aahungimwenyo ya vule okupopya naalongwa. Ta ti, nayo oya kala noku gandja omalongo kaalongwa, nkene yena okuihumbata uuna ya taalela uupyakandhi wa yooloka. 

Omutekuli gwaNghipangelwa, Beata Itangwa ngoka a kala naye sho ena oomwendhi hetatu okwa ti, onkundana ndyoka oye mu thigi kena iitya nomatumbulo.

“Ondali nda dhengelwa ongodhi ku mushinda ngoka ali ende paayetu kutya aanona yaayetu otaya lwithathana, konima sho ya hangakununwa Nghipangelwa okwali a zi mo megumbo. Sho nda galuka ondeya ta tandi mu kongo ihe inandi mu mona,” ta hokola ngaaka. Ongula sho kwashi, olutu lwe olwaadhika momuti lwa endjelela. 

“Ina thiga a shanga sha no ka tuna uyelele wothaatha kutya oshike naana she mu ikuthitha omwenyo, ashike shoka osho ashike sha ende po,” ta ti ngaaka.

Omupresidente Netumbo Nandi-Ndaitwah omwedhi sho kwa li a patulula pambelewa omutumba gwomaleli gopamuthigululwakalo okwa kumagindha aaleli yopamuthigululwakalo nayo ya yambidhidhe okuhwepopaleka onkalo yeyikutho lyoomwenyo. Nandi-Ndaitwah okwa ti okwa lulilwa komwaalu gwaantu taya ikutha omwenyo tagu indjipala moshilongo. 

“Aalumentu okwa ndhindhilikwa oyo yena omwaalu gu li pombanda mokati kaantu mboka yi idhipaga, ihe otashi uvitha omwenyo gwandje nayi,” ta popi neyeme.

Ta ti, sha ikolela kuuyelele wa gongelwa kendiki lyoNamibia Revenue Agency (NamRa) aantu ye vule 542 oyi ikutha omwenyo okuza omumvo gwa yi sigo onuumvo. Nandi-Ndaitwah okwa ti omwaalu ngoka otagu ehameke noonkondo, onkene opwa pumbwa okukuthwa onkatu tayi vulu okukandula po shoka hashi etitha omayikothomwenyo.

Ta ti, nonando okwaa na kiilonga nako uupyakadhi wa taalela oshigwana, itashi gandja etompelo lya kola oshoka oyendji yi ikutha omwenyo oye na iilonga.

Uuministeli wuundjolowele nonkalonawa nawo owa li wa pititha uuyelele kutya omayikuthomwenyo moNamibia oge li pombanda menenevi Africa.

“Okuza moomwaalu adhihe ndhoka dha kala nokundhindhilikwa omimvo dha zi ko aalumentu otaya ulike ye li pombanda okwiikutha oomwenyo shoka tashi limbilike,” wa nyola ngaaka. vkaapanda@nepc.com.na