ONGWEDIVA- Omalelo opamifyuululwakalo okwa ti ina shi puka ngeenge okaana ta ka tulwa kofani ya ina shaashi ota shi kwafele opo okaana ka mone oufemba noku ya kofikola. 

Ovaleli vopamifyuululwakalo okwa nyamukula ve likwatelela koshikumungu shomukainhu weedula 34 e na ounona vavali ve li kalwa kooxe ndele teva tula kofani yaye. 

Beata Abraham omukalimo womOngwediva okwa ti okwa tula ounona kofani yaye shaashi okwa hala ounona vaye kofikola oshoyo va pewa oufemba woshilongo. 

“Okaana kange koshiveli oke na eedula nanho ashike paife oha kai kofikola shaashi nde ka tula kofani yange. Onda kufa etokolo lomondjila shaashi ina ndi hala ounona vange va kale mekano,” ta ti. 

Omukainhu ou e na konima eshi a kwatwa koudu wombada okwa hokolola ta ti pefimbo a ninga eteelelo lokaana koshiveli okwa lombwela omulumenhu waye ndele ta faduka po. 

“Onda ninga eenghendabala doku mu konga ashike ina ndi mu mona fiyo onena,” ta ti. 

Abraham okwa hokolola ta ti natango omudo 2023 okwa mona po omulumenhu umwe ndele te mu pe eteelelo nokonima okwa faduka po. 

“Okaana kange konghelo keedula mbali natango onde ka tula kofani yange shaashi ina ndi hala ka kale mehalakano,” ta ti. 

Okwa ti ina teka omukumo wokutekula ounona vaye no nande ve li kalwa kooxe. 

“Ohandi twikile okutekula ounona vange. Onda pandula shaashi paife ova mona oufemba vo otava dulu okuya kofikola,” ta ti. 

Abraham okwa ti okwa pandula epangelo eshi la pitika ovakainhu opo va dule okutula ounona keefani davo. 

 Okwa ti ota pandula epangelo shaashi oha kwata oshimaliwa shopendjele eshi e na oulema wombada. 

“Onda lemana pefimbo di na omido 12 ndi li mondodo onhi-5,” ta ti. 

Elenga linene loshitunda shaUukwambi Chief Ndilimani Iipumbu okwa yelifa ta ti ngeenge omulumenhu okwa faduka po okaana kaye nena omukainhu oku na oufemba wokutula okaana kofani yaye. 

“Osha fimana kokaana opo a ka mone oufemba oshoyo okukala ta ka mono omayakulo opashiwana,” ta ti. 

Elenga noku li omupopiliko welelo laUkwanyama Andrew Naikaku naye okwa weda po ta ti ina shi puka ngeenge omukainhu ta tula okaana kofani yaye. 

Naikaku okwa fatulula ta ti nale pamukalo womufyuululwakalo omulumenhu okwa li hai fanwa ndele ta pulwa kovakulunhu ngeenge osho shi li okwa ya moixulo nomukainhu ou. 

“Paife ovanhu iha va longifa vali omukalo wopamifyuululwakalo osho shi li tashi etifa omafimbo amwe ovakainhu va mone ounona vehe na ooxe,” ta ti. 

Okwa ti paife ounona ve li keefani dooina ova ninga vahapu shaashi ooxe ve li kala omanga vamwe ka ve wetike 

fhamalwa@nepc.com.na