OSHIKUNDE – Ovanafikola kofikola Oshikunde Combined itava nangala vali pedu molwaashi paife ova pewa omatalashe 260 neembete 260.

Ofikola oya pewa omakwafo kehangano loTerminal Investment Namibia oshivike sha dja ko.

Oshikunde Combined ofikola i li moshitukulwa shaHangwena komukunda Oshikunde.

Omukulunnhufikola pofikola Oshikunde Combined, Hoster Simasiku okwa ti ovanafikola nale okwa li tava mono oixuna yokunangala pedu shaashi kakwa li pe na eembete nomatalashe.

“Ofikola yetu oya pewa omakwafo komahangano a yooloka. Ovanafikola ngeenge va pita nawa natango ohava pewa omaano,”  ta ti.

Simasiku okwa ti okwa pandula omahangano eshi a yambidida ofikola yaye.

“Natango ohatu pandula epangelo eshi tali twikile okuyambidida ofikola yetu molwaashi otwa tungilwa eengulufikola dipe osho yo omuhandjofikola nombelewa,” ta ti.

Okwa yelifa ta ti otashi tu ovanafikola omukumo wokulihonga nelitulemo ngeenge tava pewa oikwakwafifohongo.

Ofikola Oshikunde Combined oi na ovanafikola 1 032, okudja pondodo yopedu fiyo onhi-12.

Okwa ti ofikola yaye ohai piti nawa noi na ovahongifikola tava longo nondjungu omo omudo wa dja kwa li i li ponomola onhine momakonakono ondodo 12.

“Ohatu lalakanene opo ofikola yetu i kale ponomola yotete moshilongo. Out na ondjodi opo omunafikola keshe a kale a pita pofikola yetu,” ta ti.

Kombinga ikwao, omukulunhufikola okwa ti ova taalela omashongo eengulufikola inadi wana naashi osha eta opo ovanafikola va kale va finana mo meengulu. –fhamalwa@nepc.com.na