Ombelewa yomupresidente oya kunghilila oshiwana opo shi ha itavele omishangwa dili kosocial media odo tadi ti vati omupresidente Hage Geingob okwa eta po elunduluko linasha neetundi doshipala noshipala sha landula efyo lotete shoCovid-19 olo la lopotwa moshilongo oshivike shadja ko.

MOlomakaya ombelewa yomupresidente oya tuma omushangwa koikundaneki kutya omupresidente ina eta po nande elunduluko lasha, nomolwaasho omushangwa oo tau tamblwafana komalungula owoipipulu. 

“Kape na eunduluko, etameko lofikola oli li ashike ngaashi la shivifwa nale nomafiku oku tameka ok uli ashike ngaashi eli, kakele koshitukulwa shErongo osho fiyo opapa shili pondodo onhinatu yepato molwa omuvalu woiningwanima yoCovid-19 oyo tai lundu pombada moshitukulwa omo. Ombelewa tai ti epangelo fiyo opapa inali eta po elunduluko lasha, no inali tokola kutya oshike –shipe tashi ningwa po –shinasha nonghalo yokErongo. 

Ombelewa tai ti, keshe etokolo lipe tali etwa po komupresidente nokepangelo laNamibia oha li yandjwa la yela moshiwana opo ku amenwe eemwenyo, noku fiwe oshisho kutya wOmunamibia keshe okwe li amena koshiponga shoCovid-19. 

“Eeenghundana doipupulu otadi kufa po ongushu neenghono odo epangelo laNamibia tali longifa oku lwifa etandavelo lombuto oyo, onghee oshiwana otashi kunghililwa opo shi li kale ke kokule nomitotolombo,” ombwelewa yomupresidente tai ti.
-Nampa