Ministeri !Hū-omkhâis, ǁGam-i tsî !Hūde ǁKhawa Kō!gâs dib, Calle Schlettweini ge ge mî, ǂhanub ge ǀnai 166 tsaude a kurusa, ǁnāpa a ǂâi!nâǁguisa !gôab 206 didiba xu. Nē tsaudi ge !nakaǂnôa ǂguro ministers beros !nâ-ū ra mûǂamhe ǀkhurub huib ǂōǂōsib ǂgaesa xu N$32 miljuns ǀkha ge dīhe. Minister Schlettweini ge nē ǂanǂansa ai!â gere ǂoa wekheb ai parlements !nâ ge dī, ǁnāpab ge Popular Democratic Movements (PDM) di parlements ǁanib, Diedrick Vriesi di dîs ai gere !eream ǁaeb ai. 

Vriesi ge Schlettweina xu gere ǂan ǂgao, mâtikō tsaudi ge N$126 miljuns hîa ǀkhurub huib ǂōǂōsib ǂgaes !nâ hâsa xu a khaohesa. ǁNā N$126 miljuns ge ǂoa ge kurib ǀHōǂgaeb ai ge māhe î-i ǁgam-e ǁnā ǀkharigu hîa ūhâ tamagu tamas ka i o-i ǁgam-e a ǀorogu tawa sī-ūhes !aromas !gao. Ministeri ge parlements ǁanina ǁgui!āba tsî ge mî, ǁnā 206 ǂâi!nâǁguihe ra tsauga xu gu ge 166 tsauga N$32 miljuns ai a dītoahesa. “Nēpa a ǁaraǂuisakha ge ǁKharas ǀKharib tsî Kunene ǀKharib hâkha. Nēsi da ge a ǁaxa hāǀaro ra 40 tsauga kurus ǀkha,” tib ge ge mî. Schlettweini ai!â ge mî, ǂhâbasa a i asa mâ ǁani-i hoa-i nî ǂansa ūhâsa, ǂGuro Ministers di Beros ge 2019/20 marikurib !nâ ǀKhurub Huib Proxrammi !aroma hoa 14 ǀkharigu ǁga ǂnûiǂuisa maride a sîsa. “ǀKharisi ǀawemā!nandi ge ǂhunuma ǀaweǁguigu mâtis nē marisa nî sîsenūhes diga ǂgaekhâi, tari-i nî dīsa ǂgaekhâi tsî tsauga kurus ǀkha ge ǂnāǁnâ,” tib ge ge mî. !Ereams nē ministeris ge nē proxrammi di ǂnāǁnâs !nâ ūhâ is ge, hoa !gûǁnâǀgauba mûǂam tsî ǂhâbasa texnise huiba mâ tsî ǁawoǁawosa, nē ministeris ǁgui hâ ǂgaoǀkhādi tsî ǁgaragu ai gu tsauga nî dīǀoaǀoasa. !Nāsa !âb nē ǂnûiǂuisa maris dib ge, Schlettweini ge mîsa !oa 70 tsaugu hîa N$23.6 miljunsa nî ǂganga ǁKharas ǀkharib !nâ kurus !aroma nî sîsenūhe. Kavangob Huriǂoas ǀkharib ge 15 tsauga nî hō, N$11.6 miljuns ai.