Auleria Wakudumo

Omuprima woshilongo Elijah Ngurare okwa holola kutya epangelo oli li pamwe novaeti voihokolola moshilongo, sha landula eponokelo lowina olo la ningilwa omweeti woihokololo waNdangwa mexuliloshivike. 

“Kovaeti voihokolola vetu, ovo va taalela omashongo efyo, onda hala mu shiive kutya omupresidente oku li pamwe nanye, ame ondi li pamwe nanye nepangelo oli li kombinga yeni,” Omuprima ta holola ngaho. 

Ngurare okwa holola kutya eponokelo eli otali feekelwa la ningwa kovanhu ovo va longa omunyonena washa nova pewa ehandukilo momhangu. 

Omupopiliko wopolifi Deputy Commissioner Kauna Shikwambi okwa koleka kutya omweeti woihokolola mOndangwa okwa monifwa oshiponga eshi a yashwa. 

Oshiningwanima eshi osha ningilwa meumbo lonhumba moExtension 16 mOndangwa, Etitano lwopo 07h10. 

Otaku hokololwa omweeti woihokolola, omukainhu weedula 30 oo ha longo komhangu yaNdangwa a ponokelwa kovafekelwa vavali ve lituvikila komesho. 

Ovafekelwa vati ova tatula ekende lotuwa yomweeti woihokolola ndele tave mu yashe nondjebo yombistoli metundji. Otaku hokololwa vati va umba oikando itatu, eeholo mbali inadi kwata naimwe oyo ya yasha omweeti woihokolola metundji. 

Ovafekelwa ovo tuu ovo, otaku hokololwa vati va tila omeva okuxwika hano oacid motuwa aishe yomweeti woihokolola. 

Otaku hokololwa nakuningwa oshihakanwa ta mono epango lopaunamiti moshipangelo mOndangwa. 

-wakudumoauleria@gmail.com