ONIIMBWELE – Opolisi moshitopolwa shaShikoto oya lopota aantu omugoyi ya hulitha moshiponga shohauto, sho ololi nombetsa yoIveco yi idhenge mumwe. 

Oshiponga shika osha ningilwa pomukunda Oniimbwele moshitopolwahogololo shaShikoto komatango gOmaandaha. 

Omukuluntu gwopolosi moshitopolwa Ndeshipanda Iifo ngoka a koleke oshiningwanima shoka okwa ti aantu 14 ya hupu mombesa oya falwa koshipangelo hoka taya mono uuhaku. 

Iifo okwa hokolola kutya ombetsa yOkambebe Transport oya li yi ipumu mumwe nololi yokututa iinima iidhigu yaNiimboto Construction CC. 

Ta ti, oshiponga osha holoka sho ololi kw ali tayi zi kombinga yaNathinge yu uka kombinga yaNdangwa, hoka kwali taku zilile wo ombetsa yu uka koWindhoek e tadhi idhenge omitse mumwe. 

Otaku hokololwa kutya omuhingi gombetsa okwa li a hulithile poshiponga omanga omuhingi gololi a ka mona uuhaku nokwa ndhindhilikwa a ehama shi nyanyaleka komagulu agehe. 

Pethimbo oshifo shika sha nyanyangidhwa, Iifo okwa ti oonakusa ashike yamwe ya li ya tongololwa kaapambele yawo onkene otaya ka tseyitha ashike omadhina gaayehe ngele ayehe ya tongololwa kaapambele yawo. 

Omalutu goonakusa oga falwa kokila koshipangelo kOnandjokwe. 

Okwa li wo a indile mboka yaa wete aapambele yawo ya li moondjila ihe inaya thika, opo ya ka tale ngele koshipangelo kOnandjokwe. 

Oshiwike sha zi ko omulumentu gwomimvo 49 okwa hulitha koKalkfeld sho oololi mbali dhi idhenge omitse mumwe. 

Otaku hokololwa kutya ololi yimwe okwa li tayi hingwa kombinga yondjila ya puka. 

Opolisi opamwe nehangano lyetonatelo lyoondjila onkene taya tsikile okukumagidha oshigwana shi hinge nuukeka. 

-vkaapanda@nepc.com.na