Auleria Wakudumo
Ouministeli woikwameni neameno lokeengaba otau shivifile ovakwashiwana kutya otava dulu okupula va fanekululwe omafano oumutwe voshilongo osho yo okulundulula okushaina.
Ouministeli owa holola kutya eshi otashi dulu okuningwa ngeenge wa li wa fanekwa nale nolupe loye ola lunduluka paife ile ngeenge wa lundulula okushaina kwoye.
“Oto dulu okulundulula efano loye lopokamutwe osho yo eshaino loye olo li li po unene ngeenge owa lunduluka molupe wefimbo,” ouministeli tau holola ngaho.
Ovanhu vahapu otaku hokololwa va ninga omaindilo oumutwe voshilongo omanga vanini, vamwe ova fanekelwa mofikola molwaashi va pumbwa oufemba woshilongo okushanga omakonakono a xuuninwa nomafano avo itaa tu vali kumwe naao e li poumutwe.
“Ngeenge owe lihanga u li monghalo ei, oto dulu okuya kopolifi opo u ka shangife oumbangi tau hokolola kutya oove u li mokamutwe omo, noto pula epitikilo opo u ka fanekululwe,” tava fatulula ngaho.
Ovakwashiwana ova indilwa opo va kwashilipaleke kutya oumutwe vavo voshilongo ove va fa e shi ve li monena.
Ngeenge tashi ya koinima ya nyika eembaanga, vahapu ohava kala tava tanguna molwaashi tava pula va shaine ngaashi shi li pokamutwe.
Tangeni Shipuku, omukalimo womOngwediva okwa holola kutya ota ka kala umwe womwaavo tava ningi votete oku ka lundulula omafano nomashaino avo.
Shipuku okwa ti ka li eshi ngeenge eshi to shaina pokamutwe osho u na okushaina unene moinima yopambelewa fiyo alushe.
“Onda li nda kumwa eshi nda ya kombaanga yoFirst National Bank ndele handi shivifilwa kutya ombapila yange ita i tambulwa shaashi eshaino lange itali tu kumwe naalo li li pokamutwe,” Shipuku ta hokolola ngaho.
Okwa ti ombaanga oye mu pa ombapila opo e lihongele eshaino laye lopokamutwe olo ta ti ka li ta dimbuluka momutwe nokuli.
“Okamutwe kange nghi ka hole shaashi oke na efano lange manga ndali moluhepo la memememe, efano olo itali tu kumwe nolupe lange,” Shipuku te shi yolo po ye mwene.
Ouministeli otau indile ovakwashiwana opo va kwashilipaleke kutya ove lifa nomafano oo e li poumutwe vavo.