Taimi Haihambo
Opolifi moshitukulwa shaShikoto oya unganeka onduba yovatonateli vomidingonoko, va ka file oshikunino shoifitukuti Etosha National Park oshisho.
Etosha onhele oyo hai kala oinamwenyo yomofuka i li koshi yepangelo, nopolifi moshitukulwa oya didilika ovakwashiwana hava ningile oifitukuti ei oukongo uhe li paveta.
Omukulunhu wopolifi moshitukulwa Ndafudha Iifo okwa ti Etosha oli li moshitukulwa shavo, noli li mondjila yovaendanandjila vahapu ava hava kala ovafekelwa voukongo woifitukuti wa ngabewa kepangelo.
“Ondi udite etumba lakula okutuma ongudu yovakainhu osho yo ovalumenhu moshikumungu shetonatelo loifitukuti ei opo oibofa youkongo wa ngabekwa i shune pedu,” ta ti.
Ovakalimo ava have livakele mEtosha shihe li paveta tava ka vaka mo oifutukuti vo vamwe tava vake oilyo yoifitukuti ovo tava shunifa omwaalu woifitukuti ei pedu vati.
Etosha National Park oli li oshiima shinene ngeenge tashi ya peliko loshilongo shaashi olo hali nane ovatelelipo okudja kondje yoshilongo, va tale ngheee Ovanamibia tave shi endifa momukalo ou, tava xumifa ekonomi loshilongo pombada shaashi ohava eta lela oshimaliwa shi li nawa moshilongo.
Konima yeemwedi mbali opolifi oya li ya kwata po omulumenhu weedula 31, oo vati a li e lininga ondudu yokupanga ovanhu ava vehe na omikanda opo va ye va ka ninge oukongo mEtosha vehe na oufemba.
Eshi osha li sha kolekwa komukulunhu wopolifi moshitukulwa shaShana, Naftal Lungameni oo e li omukulunhu weameno lEtosha moshitukulwa, kutya vati ondudu ohai yandje oimbodi nokupanga ovanhu ovo hava ka dipaa oifitukuti koshikunino shoinamwenyo
Vati tete manga ovanhu inava ya kEtosha National Park ohava piti kondudu, ndele tava pewa oimbodi nelalakano lokukala inava kwatwa po kopolifi.
Opolifi oya hokolola tai ti ngeenge omunhu okwa aluka kEtosha natango oha piti keumbo londudu oyo ndele ta pewa vali oimbodi opo vati a kale ina monika kopolifi.
Oiningwanima yoludi eli oyo ya etifa eemwiya daShinana mOshikoto di dule ko eenghaku, do di wede ko keameno loifitukuti mEtosha.
-taimihaihambo2000@gmail.com