Minista wemona Ericah Shafudah okwa holola omutengenekwafaneko woshimaliwa shopokati komudo 2025/2026 shi fike pobiliona N$1,2 onghela meumbo lomutumba wopashiwana.
Minista okwa li nale a ninga omutengenekwafaneko womudo 2025/2026 mo27 Maarsa 2025 weebiliona N$106.3.
Ouministeli wehongo, oungoba, omaudano novanyasha ou li umwe womeeministeli odo da pewa oshimaliwa shi li pombada.
Ouminsteli wehongo owa pewa oshimaliwa shi fike peemiliona N$814. Eemiliona edi otadi ka longifwa moitukulwa ya yooloka mehongo ngaashi okufutila ofikola yovalihongi osho yo okukuta ovahongi. “Sha landula eshi omupresidente a holola kutya Namibia ota ka kala e na ehongo lopombada loshali okudja modula tai ya, eemiliona N$663 otadi ka longifwa okufutila ovalihongi koiputudilo ya yooloka okudja modula tai ya,” minista ta kwashilipaleke ngaho.
Minista okwa fatulula kutya oshimaliwa eshi otashi ka longifwa okufuta oshimaliwa shomalishangifo ovalihongi koiputudilo osho yo oimaliwa yelihongo lavo okudja muJanuali fiyo Maarsa 2026.
Shafudah okwa holola kutya epangelo ola uda onghuwo yovahongi ovo va kuwa oule wefimbo eshi vehe na oilonga. Eemiliona N$151 otadi ka longifwa okuyandja oilonga kovahongi ve fike po 665. Eshi otashi ka ningwa opo ku kandulwe po endubalalo lovahongwa mongulu imwe molwaashi ovahongi inava wana nawa. Omanga ouministeli wouhaku nonghalonawa wa mbedekwa eemiliona N$185. Eemiliona edi oda nuninwa okuyandja oilonga kovanambelewa vouhaku ve fike po1 537. Shafudah okwa twikila ta ti eemiliona N$61 oda nuninwa ouministeli wemona, otashi ka pungulwa okulongifwa oinima yapamba oinima yopaushitwe ngaashi efudja, oiponga yomundilo, oshikukuta naikwao.
Okakomisi komahoololo oka pewa oshimaliwa shi fike peemiliona N$30, okuweda ko koipumbiwa yomahoololo oo twa taalela.
Pefimbo ta yandje olopota yoshimaliwa shomutengenekwafaneko okwa holola kutya okwa li nale a fikama meumbo lomutumba wopashiwana okuyandja omutengenekwafaneko womudo 2025/2026 weebiliona N$106,3.
Ouministeli wehongo owa li nale wa pewa oshimaliwa shi fike peebiliona 24,8 muMaarsa omanga ouministeli wouhaku wa li wa pewa eebiliona N$12,3.