ONGWEDIVA – Omupopiliko wongudu yomhilamena yoIndependent Patriots for Change (IPC) monooli Eino Heelu okwa ti ove lilongekida okukala va tuma oilyo yongudu yavo i li 12 tai ka kufa ombinga momahoolo oukaansela koikandjohoololo aishe yomOhangwena.
Meenghundafana va ninga onghela naKundana, Heelu okwa ti natango IPC ota ka kufa ombinga momahoololo omalelo eedoolopa ngaashi kEenhana, Helao Nafidi osho yo Okongo. Okwa yelifa ta ti kEenhana otaku tumwa ovanhu tava di mo-IPC ve li vaheyali, Helao Nafidi ovanhu vaheyali omanga Okongo ovanhu vatano. “Kumwe ohatu tumu ovanhu vetu 19 tava ka kufa ombinga komalelo eedoolopa,” a weda po. IPC ongudu yomhilamena yopambelewa moshilongo konima eshi omudo wa dja ko momahoololo omutumba wopashiwana ye ya ponomola onhivali.
Heelu okwa ti ngeenge oilyo tai di mo-IPC oya hoololwa okuninga ookansela voikandjohoololo yomOhangwena otava ka kandula po omumbwe yenota lomeva.
“Otwa didilika oshiwana moshitukulwa shaHangwena tashi dengwa kenota unene koikandjohoololo ngaashi Epembe nOmundaungilo,” ta ti.
Okwa ti oshiwana nashi kwashilipaleke kutya otashi hoolola IPC shaashi otashi ka etelwa omayakulo a yooloka popepi.
“IPC oku na olukeno noshiwana. Ohatu lalakanene okutunga eepate noipangelo neefikola koikandjohoololo aishe,” ta ti. Heelu okwa ti ongudu yavo yo-IPC oi na efaneko lakula ngeenge oya hoololwa okuninga eekansela dokoikandjohoololo, okukandula po omukundu wokuhe na oilonga kovanyasha aveshe moshilongo.
“Oshiwana nashi yandje omhito ko-IPC okulela koikandjohoololo molwaashi ohatu ka eta po omalunduluko mahapu ngeenge tashi ya pokuyandjaneka omayakulo,” ta ti.
Heelu okwa ti IPC ongudu ihe na okatongo notai lalakanene onghalo nawa yOmunamibia keshe.
“Indeni mu ka hoolole IPC shaashi ookansela vetu otava ka longa nondjungu okuyambidida oshiwana,” ta ti. Okwa yelifa ta ti natango IPC ota ka kwashilipaleka kutya oshiwana osha mona eenhele domadu dokutunga omaumbo keedoolopa da yooloka.
“IPC ota ka kondjifa omahepeko omomaumbo ngaashi unene ounona tava kwatwa onghonga osho yo ovakainhu va ninga oihakanwa yokudipawa,” ta ti.
Heelu okwa ti nghene okudja omudo IPC a totwa ina findana momahoololo oukansela moshitukulwa shaHangwena ashike neudo oku na omukumo kutya ota ka findana. Okwa ti modoolopa yaEenhana naHelao Nafidi oku na mo oilyo ivali keshe kumwe.