Lahja Nashuuta

Ehangano loAgribank Market and Trade Agency nedina la shivika nawa AMTA ola landa omahangu ongushu yoshimaliwa shi fike peemiliona N$48,6 okudja movakwashiwana.  

Omupopiliko waAMTA Pasval Elijah okwa koleka kutya ehangano lavo ola landa eetona 7 462 okudja kovanaafaalama Ovanamibia okudja muApilili fiyo omuSeptemba neudo. Eetona adishe oda kosha ongushu yoshimaliwa sheemiliona N$48,6. 

AMTA okwa landa eetona 1 075,99 domahangu keemiliona N$7,6 osho yo eetona 6 386,67 domapungu keemiliona N$40,9. 

Meenghundafana naKundana, Elijah okwa holola kutya mopaife mokaanda kepangelo omu na eetona 7 371,70 domapungu neetona 1 075,99 domahangu. 

Omahangu nomapungu oo e li mokaanda kepangelo okwa pungulwa mouanda ve li meedoolopa da yooloka, ngaashi: Ongwediva, Omuthiya, Tsandi nOkongo. Ouanda ava ova kalela po eepelesenda 32,2 deetona 22 900 moshilongo. 

“Nonande twa mona omuloka muwa moshilongo neudo, AMTA okwa li a taalelwa komashongo amwe oo a imba ehangano li wanife po okukwata oipalwifa moshilongo,” Elijah ta holola. 

Elijah okwa ti kutya molwomuloka muwa, okueta po oikumona ihapu nako okwa ya moshipala oilonga yokushingifa. Ta ti ovanafaalama vamwe vati ova kala inava hala okulandifa pefimbo shaashi vati va li va teelela efimbo la wapala opo va landife oikumona yavo. Okwa ti vamwe vati ova kala va hala ovanhu va mane po opo va dule okulandifa oilya yavo kondilo. 

Elijah okwa ti eshi osha eta oilya ile oikunomwa imwe i kale ya tukwa eshi ye ya okulandifwa kexulilo lodula. Okwa ti oo oo amwe omashongo AMTA a taalela okudja kovanafaalama. 

Nande ongaho, Elijah okwa kwashilipaleka oshiwana kutya inashi pumbwa okulimbililwa kusha molwoipalwifa shaashi opo i li ya wana. 

“Inamu tula omitwe komapepe. Nonande momaanda mu na ashike eepelesenda 32 doikulya, edi oda wana okutukulilafana neudo shaashi otwa teya oipalwifa ya wana neudo shi dulife omido mbali da dja ko,” Elijah ta holola ngaho. 

Omupopiliko waAMTA okwa holola kutya ovanafaalama vahapu ove na oipalwifa ya wanena ovaneumbo vavo nova landifa ashike oixupe oyo ya xupa ko eshi ouanda wavo va hada. 

“Ngeenge omhumbwe yoikulya oya holoka, AMTA ota dulu okulanda kovanafaaalama Ovanamibia ile okukufa pondje yoshilongo,” ta kwashilipaleke ngaho. 

Mokulanda kovanafaalama vomoshilongo, AMTA ota yambula po ovanafaalama ava, ta xwaxwameke oipindi pokati kovakwashiwana nomahangano nokukaleka po oikulya. Ehangano otali yandje yo omhito iwa kovanafaalama opo va dule okulandifa oilongomwa yavo pambelewa nokukaleka oikunomwa yavo momaanda opashinanena opo oikunomwa yavo iha tukwe. 

Elijah okwa indila ovanamapya ovo ve na oikunomwa ngaashi omahangu ile omapungu naikwao opo va kwatafane nombelewa keshe yaAMTA opo va dule okulandifa voo va mone mo oyuuyemo. 

-lnashuuta@nepc.com.na