OSHAKATI – Ovanambelewa vopolifi va dja moshitukulwa shaShana nena otava kala ve na efiku lomaudano kokapale komaudano ke li mOshakati.
Omukulunhu wopolifi moshitukulwa shaShana Commissioner Naftal Lungameni Sakaria okwa ti ovapolifi tava di koitaashi ya yooloka moshitukulwa ova teelelwa okukala va fika.
Sakaria okwa ti omaudano aa okwa fimana shaashi otaa ka eta ovapolifi pamwe osho yo okushivafana.
“Omaudano aa otaa eta po oukumwe nelongelokumwe mokati kovanambelewa vopolifi,” ta ti.
Okwa ti ovapolifi otava ka kufa ombinga momaudano a yooloka ngaashi etanga lokeemhadi, okulotoka, etanga lomokambaba nosho tuu omaludi oudano a yooloka.
“Kokapale otaku kala kuwa unene shaashi ovapolifi otave ke lihafifa nokuninga omafindano okukufa ombinga momaudano,” ta ti.
Sakaria okwa ti osha fimana opo ovapolifi va kale va hangana nokukala ve na ombili efimbo keshe.
Natango, okwa ti efiku eli lomaudano otali yandje ehongo nouyelele kombinga yefimbo longhalonawa yopamadilaadilo.
Omaudano oludi eli otaa ningwa koitukulwa ya yooloka moshilongo.
Okwa ti oshiwana osha manguluka okukala sha fika kokapale okukatala omaudano nokuhafela pamwe novapolifi.
“Kokapale otaku ka landifwa oikulya osho yo oikunwa onghee oshiwana nashi holoke momwaalu muhapu. Ileni mu tala ovapolifi eshi tava dana okatanga kokeemhadi,” ta ti.
Okwa yelifa ta ti omayakulo opolifi otaa twikile koitaashi ya yooloka moshitukulwa nonande ku na omaudano nena.
“Ope na ovapolifi vamwe ovo tava kala ve li koitaashi tava yakula oshiwana shaashi omayakulo opolifi okwa pumbiwa efimbo keshe,” ta ti.