Auleria Wakudumo
ONGWEDIVA – Nonande oudano womadeulo ogymnastic inau talika ko wa fimana ngaashi omaudano akwao koitukulwa yokonooli, KMA Gymnastic okwa lundulula edilaadilo eli, eshi a eta po oudano inau danenwa mo nale mOngwediva nokuvena eembadi 46.
Omudeuli, Tangi Shilongo okwa holola kutya ova kufa ombinga moudano womadeulo ogymnastic pehovelo lomwedi ou ndele tave shi pondola okuvena eembadi 46.
“Otwa vena eembadi doingoli di li 16, eembadi doshisiliveli di li 23 osho yo eembadi doshikushu di li heyali,” Shilongo ta holola ngaho.
Shilongo okwa ti okwa pandula ovadeulwa vaye eshi ve shi pondola meengudu 12 odo da kufa ombinga moNamibia Gymnastics Federation (NGF) National Artistic Championship, hano efiyafanepo loudano womadewo ogymnastic moshilongo.
Shilongo okwa ti okwa uda etumba eshi ounona vaye ve shi pondola nonande kave na oulideulifo aishe ya wana po mOngwediva.
KMA Gymnastic oha deulile ounona vaye mosenda yoMulti Purpose mOngwediva, omo ha indile ashike onhele noku na efimbo la ngabekwa okuninga omadewo aye.
KMA Gymnastic okwa taalelwa komashongo okuhe na oilongifo ya wana po okudeula ovahongwa vaye. Luhapu oha longifa omatalashe opo ta pa fikile ovadeulwa. Konima yedeulo keshe, ohava yalulula po ashishe osho va li va yala pedu nokudikulula po eepala dokunuka opo va yandje omhito kwaavo va hala okulongifa vali onhele.
“Ngeno otwa li tu na onhele yetu fye vene noilongifo aishe ya wana po, ngeno ounona vetu otava i komesho momadeulo avo,” Shilongo ta ti.
KMA okwa ninga kahewa kounona, unene ounona voukadona. Ota kufa yo ounona ava mokweendaenda nokukwelaakwela momapandaanda konima yofikola.
Shilongo okwa holola yo kutya vamwe ova li ve na eehoni eshi va hovela omadeulo, ashike paife kave na vali oumbada washa.
KMA Gymnastic okwa hovela mo2021 kuKally Abiatal okuholola kutya oudano wa tya ngaha nomonooli otau dulu okudanwa.
Shilongo okwa ti okwa tokola a waimine Abiatal shaashi naye okwa li omudani nokwa mona nghene oudano ou tau dulu okukwafela vahapu.
Monena, KMA Gymnastic oha deula ounona 21, vahapu vomuvo oukadona okudja peedula nhano fiyo 16. Ounona ohava deulwa Olomakaya alushe poSam Nujoma Multipurpose Centre mOngwediva.
KMA Gymnastic ota indile Ovanasamaria ovanamutimanghenda opo va waimine okukwafela moipumbiwa oyo va pumbwa opo va dule okutwikila nomadewo avo pehe na omaimbo asha.