Auleria Wakudumo
ONGWEDIVA – Omushikingalo Leo Nghilifilwa nedina la shivika nawa KangweSon okwa alukila natango mondabo noalbum ipe “your crown is waiting,” osho sha hala kutya oshishani shoye oshe ku teelela.
KangweSon okwa ti oshishani shaye oshe mu teelela, noku na oku shi mona ngeenge okwa longo noudiinini.
Oalbum yange oya nyama konghalo yefiku keshe oyo ovanhu hava pitile muvo unene ovanyanyamaulu.
“Ohandi kendabala okushika eengalo odo keshe umwe ta dulu okulikolelela, okuuda ko noupu nokwiimba pamwe naame. Etumwalaka li li moalbum yange ole li kutya natu longeni noudiinini opo tu hange omalalakano etu,” KangweSon ta fatulula.
Eengalo edi de mu eta mowela
KangweSon okwa shivika kuvahapu molwongalo yaye oyo ya andjakana noshilongo ‘Suwala osho yo Ndikufe po episode”.
“Suwala okwa ningifa nge ndi kale ndi shivike kuvahapu molwounongo wange wokwiimba, omanga ndi kufe po episode a tula omboloto poshitaafula shange,” KangweSon ta ti ngaho.
Okudja nghene a tameka okushika eengalo mo2018, Kangwe ina lwa ondede moilonga yaye. Okwa kala nokupitifa eengalo keshe kodula noku na eealbum hetatu. Nomodula yoCorona, Kangwe okwa pitifa oalbum.
Omashongo
KangweSon okwa ti okwa taalela ashike eshongo lakula loovene vomajukujuku tava ningi eekopi (CD) doungalo vaye.
“Otava ningi oimaliwa nomadina etu ashike ihave tu pe ko nande epeni opo tu dule okufuta onhele omo to ningile eengalo doye,” ta ti ngaho.
Moalbum yaye ipe, KangweSon okwa ti okwa longela kumwe novashikingalo vakula ovo ina longela nale kumwe navo ngaashi Young T naDJ Vuyo.
Okwa longela yo kumwe naZomblam, Chaki Beat, Makilla, Voster naInspector One moalbum yaye.
KangweSon okwa holola kutya pehovelo loshitalendi shaye, okwa li eshi ota imbile ashike omboloto yaye ashike paife okwa didilika kutya ota lundulula eenghalamwenyo dovanhu vahapu.
Oalbum yaye oi na eengalo di li 20. Ota kwatafanwa naye konomola yongodi 0818205331.