Muinasipula wa Katengo ka Likhuta za Sizo, Mulena Immanuel Gaseb Labulalu nafitisize manzwi ahae kulwanisa Mulao wa Mubu osweli kukandekiwa mwa Ndu ya Milao, naize baeteleli ba sizo habana ku amuhela mulao wo. Mwa manzwi ahae kwa katengo kandu ya milao hala litaba za zwelopili ya libaka za litolopo ni matakanyani, Garisen nanyazize mulao olelilwe hala litaba za kuaba mubu kuli uka amuha baeteleli ba sizo maata.

Naize mulao olelilwe, one uyalilwe ki Likwambuyu wa Njimo, Bundui, Mezi ni Cafanzo ya Mubu, Inge Zaamwani mwa kweli ya Muimunene 2025, ulwanisa mulao wa Baeteleli ba Sizo wa silimo sa 1997. Kalulo ya 15 ya mulao o ibulela kuli mulao kaufela olelilwa o ama mubu wa sizo uswanelwa kuyaliwa pili fapila katengo ka likhuta za sizo kuli babe ni sa kubulela pili usika yalwa kale mwa Ndu ya Milao.

“Kona moni zibela. Kona mokuñolezwi mwa mulao, wa Katengo ka Likhuta za Sizo, mane ni one utalimilwe sinca. Fa ni utwile kuli mubu uswanela kutalimiwa ki katengo ka mubu, mi baeteleli ba sizo habana sa kubulela fa litaba za mubu,” nekubulezi,” Gaseb.

“Ni yemela baeteleli baka, haiba katengo ka mubu inge kafiwa maata, musebezi wa likhuta za sizo seli ufi? Haluna mubu. Haluna maata falitaba za mubu. Halukoni kuzamaisa litaba za mubu. Haiba inge munga lika kaufela… kona se si taluswa? Hamusalata baeteleli ba sizo mwanaha Namibia,” na ekelize.

Gaseb nasusuelize Ndu ya Milao kuyemisa ngambolo hala Mulao wa Mubu oyalilwe ni kuikambota ni baeteleli ba sizo kakulatelela mo ubulelela mulao wa Katengo ka Likhuta za Sizo wa silimo sa 1997. Hane ayala mulao mwa ndu ya Milao, Zaamwani naize mulao ubata kukopanya milao kaufela ye fumaneha kueza mulao ulimuñwi, kungelela cwalo ni milao ya kamaiso ya mubu olekiswa ni mubu wa sizo.

Hala zeñwi Mulao olelilwe ubata kutahisa khuta ye talima za mizeko ya mubu, kuli ino talima mifilifili kaufela ya mubu, hamoho cwalo ni tutengo totukana tutalima lipilaelo za mubu mwa likhuta za sizo ze lemuhilwe – Nampa