RUNDU – Likwambuyu wa Zwelopili ya Libaka za Litolopo ni Matakanyani, James Sankwasa ukalimezi kuzwelapili kwa tekiso ya mubu wa sizo mwanaha Namibia, naize hakuna mulao mwanaha Namibia olumelela malena kapa manduna babona kulekisa mubu wa sizo.

“Mubu wa sizo usweli kulekiswa kafa ni kafa. Mubu wa sizo uswanela kuzamaiswa kakuba mubu wa sizo isiñi inge mubu wa kulekisa. Mutu ulumelezwi feela kuleka mubu mwa libaka za litolopo, isiñi kwa hae,” nabulezi mwa Rundu viki yefelile. Likwambuyu nabulela kwa mukopano wakuluta baeteleli ba sizo litaba za mulao kuzwelela mwa likiliti zepeli za Kavango ni Zambezi.

Sankwasa naize mubu wa sizo ukona feela kufiwa ki mulena, kufa sicaba. “Haiba nibata mubu niya ku nduna wa muzi kuyo kupa mubu mi yena ukani isa ku mulena, kakuli haiba kuna ni mubu walemuhile nduna hakoni kunifa ona kacwalo uni isa ku mulena, hayo lumela, wanyatela nikukufa ona isiñi kukulekiseza,” nabulezi.

“Kono nilemuhile kuli nduna uka tomela mutu yo N$20 000 kapa N$30 000, kasamulaho mutu salifile, nduna kona aisa mutu yo kumulena,” naekelize. Likwambuyu nakupile baeteleli ba sizo ni malena kuambuka kulekisa mubu sihulu kwa mazwahule, kono ubabalelwe kuli masika akwapili ato ufumana. Mukopano hala litaba za mulao nobata kukonkiseza kutwisiso ya baeteleli ba sizo hala litaba za mulao, kuli babe ni kutwisiso sakata habanze bazamaisa sicaba.