Omalongekindho gomapapa gomaudhano ngoka ga tengenekwa oku kala ko momasiku 22 gaNovomba nuumvo ogeli metifa na otaga ende nawa.

Omupopiliko gokomisi yomaudhano Givean Samulandela okwa ti oshiindingili shoka otashi ka ningilwa mehala tali ithanwa Ogwediva Trade Fair moshitopolwa shaShana. 

“Oshituthi shika otashi ka kala oshinene, shoka tashi ka gongela oshigwana okuza kiitopolwa ya yooloka moshilongo notashi kala hashi ningwa omumvo kehe miitopolwa ya yooloka,” ta ti ngaaka. 

Ta gwedha po kutya nonando epangelo lya yambidhidha noshimaliwa okulongekidha omapapa gomaudhano ngoka itashi gwanitha po ayihe sho osho shoka taya indile aananeshefa moshilongo ya yambidhidhe naashoka taya vulu opo oshituthi shika shi ende nawa. 

Samulandela okwa popi kutya ota hiya wo aanangeshefa aashona ya ningi omayindilo okugandja omayakulo ga yooloka opo oshiindingili shika shi longekindhwe nawa. 

“Omayakulo agehe oge na okugandjwa kaakalimo yomOshana opo wo ku gandjwe oompito dhiilonga, ihe itaga gandjwa kaantu taya zi kondje yoshitopolwa,” ta  fatulula ngaaka. 

Ta ti omamapa otaga ka gandjwa kaakuthimbinga yomaudhano ya yooloka osho wo mboka ya kala nokuxwaxwameka osho wo okuyambidhidha omaudhano moshilongo. 

Omukuluntu gokomisi yomaudhano Fred Mwiya okwa ti oshiindingili shika otashi ka kala oshinene noonkondo. 

“Otwa tokola nuumvo oku shi eta konooli oshoka olundji iinyangadhalwa yili ngaaka ohayi ningilwa shike kuushimba,” ta ti ngaaka. 

Mwiya okwa indile wo oshigwana osho wo aanageshefa unene konooli opo ya kwathele naashoka taya vulu opo ku longekidhwe nawa oshituthi shoka. 

Omuxwaxwameki osho wo omuholi gwomaudhano Khumalo Markus okwa ti onkundana ndjoka otayi nyuwitha omakutsi, oshoka inashi ningwa mo nale monooli nonando olundji aadhani dhingi ohaya yambuka konooli. 

-vkaapanda@nepc.com.na