Auleria Wakudumo 

Omutondoki woinano ile Paulus Vilho oye a vena po etondoko loshinano shile sheekilometa 42.2 olo la li la unganekwa koiputudilo yoUnam konooli Olomakaya mOngwediva. 

Vilho okweya wotete taku landula Bernadinus Kambwaye nomutitatu oye Kefas Serafi. Okutondoka oku ohaku ningwa alushe lumwe modula. 

Eshi oshili oshikando shititatu Unam ta unganeke okutondoka. Okutondoka okwa kwatela mo oinano ngaashi eekilometa 42.2, eekilometa 21.1, eekilometa 10 oshoyo eekilometa nhano, okutondoka ile okuenda. 

Ovatondoki vatitatu votete medingonoko leekilometa 42.2, 21.1 ova pewa eembadi, oimaliwa oshoyo omaano okudja kehangano lomakende okomesho oSpec Saver oshoyo oshipangelo shopaumwene Medipark. 

Medingonoko leekilometa 42.2, omutondoki dingi okwa pewa oshimaliwa N$800, omutivali okwa pewa N$600 nomutitatu okwa pewa N$400. 

Omanga ovatondoki vatitatu votete medingonoko leekilometa 21.1 va pewa N$600, omutivali ta mono N$400 nomutitatu okwa vena N$250.  

Ovatondoki ava veya ponomola 30 medingonoko keshe ova pewa eembadi doingoli. 

Oshinano sheekilometa 21.1 osha venwa po ku Djuulume Gabriel oo eya ponomola yotete, taku landula Nashumba Lisias oshoyo Matias Ekandjo. 

Ekandjo okwa holola kutya okwa li a hala okusholola ashike eshi a mona kutya opena oshinano pokati kaye naau a shikula ko, okwa tokola opo eli fifide yee a fike poutitatu. 

Ovatondoki ova holola kutya otava twikile okukufa ombinga metondoko latya ngaha.