Amushangandjayi goSwapo Sophia Shaningwa okwa kumagidha oshigwana shi ka hogolole ongundu Swapo okukaleka po ombili nelandulathano moshilongo momahogololo gookansela yiitopolwa nomalelo goondoolopa muNovomba.

Shaningwa okwa ningi eindilo ndyoka koshigongi shoSwapo sha li ko Osoondaha kOgongo moshitopolwa shaMusati.  Esiku ndyoka ombelewa yoSwapo Omugongo, oya li wo ya lukululwa ongaSophia Shaningwa okusimaneka iilonga a longela oshilongo shika ashihe nuunene oshikandjohogololo shOgongo.  “Otandi kumagidha wo mboka taya ka kalela po omahogololo momasiku 26 gaNovomba  ya kale ye li muushili osho wo oshigwana shoka tashi ka hogolola shi hogolole nawa, nomondjila,” ta kumagidha ngaaka. Amushangandjayi gwoSwapo okwa londodha wo aakalimo yomoshikandjohogololo shOgongo ya ka hogolole aawulikwa yoSwapo ayehe, ya shange nawa mokakololo hoka ke li pongonyo, pokati nawa, ihe haku pukitha ya hepithe omawi. Ta tangumuna aawulikwa ayehe ya kutha ombinga momahogololo ga taalelwa kutya, aanambili yo aanyasha noye na oshigwana komutima shoka taya ka  pa uuwanawa. “Aaleli mboka oye na oshigwana komutima noya tokola okulongela oshigwana shawo, sho osho shoka ya kutha ombinga opo ya ka dhenge mo mboka ye na omalalakano galwe,” ta popi ngaaka.

Shaningwa ta ti inaya hala ongundu Swapo yi fumvikwe kaatondi mboka ye yele Swapo omolwomatompelo ye ga shi yo yene, ya hala ondjokonona yaSwapo yi dhimbiwe. Ta ti, ongundu Swapo inayi sindika, naalanduli ayehe naya kwashilipaleke kutya omawi gawo ogu uvika okupitila mokuhogolola esiku ndyoka lya tegelelwa uule nethimbo. 

Ta lombwele oshigwana kutya inashi fundjwa koongundu dhoompilamena, tadhi uuvaneke iifundja kutya otadhi eta elunduluko uuna ya hogololwa ya lele oshilongo shika. Ta pula kutya otaya eta elunduluko lyini moshilongo sha mangululwa kwaamboka ye shi lwila shi manguluke.

“Ongundu tayi lele oya eta omalunduluko nomahumokomeho ogendji, tandi ga tumbula ngaashi oondjila, oosikola, iipangelo, omagumbo osho wo omeya nomauwawa ogendji moshilongo.  Shaningwa okwa thindi omuthindo kutya oshigwana inashi pukithwa koongundu opo dha totwa po ohela dhaa na omalalakano goshili.

Esiku ndyoka Shaningwa okwa li a taamba ko aantu ye li 15 ya li ya zi koongundu dhoompilamena.

Omukwatakanithi gongundu yoSwapo kOgongo Leonard Nangolo okwa kumagidha aakalimo ya ka hogolole ongundu Swapo momasiku 26 gaNovomba nuumvo.

Ta ti oshigongi shoka osha ningwa okuxwaxwameka nokulongekidha oshigwana shi kale shi shi shoka shina okukaninga momahogololo ga taalelwa.

“Nena otwa lukulula wo ombelewa yetu yoSwapo konima yaamushangandjayi Shaningwa, okusimaneka iilonga ye,” ta ti ngaaka. Omunyasha gumwe a li poshigongi mpoka okwa ti, okwa shuna kongundu Swapo oshoka okwa ndhindhilike kutya omalunduluko nomauwanawa otage ya.

“Onda li nda kutha ondjila ya puka ashike nena onda shuna kegumbo,” ta popi ngaaka. Ta kumagidha aanyasha aakwawo ya ka hogolole oSwapo oshoka oyo ashike ongundu yi li moshili.

-vkaapanda@nepc.com.na