Taimi Haihambo

Opoloyeka yeemilona N$8 odo da li da ongelwa kelelodoolopa laTsandi nelalakano lokutunga omatala okulandifila, osho ya pu nomatala okwa nangekwa pambelelwa.

Omatala vati okwa tungwa e na outala vahamano vokulandifila oihape noingumutulu, outala 17 vokulandifila okapana, outala 12, navatatu veesalona. Natango vati ope na eboloka lakula loundjuwo.

Onhele ikwao vati oya wapalekwa nokufewekwa momukalo wokunana ovaendanandjila, osho yo ovatalelipo vomodoolopa.

Omupeduminista womayambulepo eedoolopa nomaushai Evelyn    !Nawases okwa ti, onghatu ei ya katukwa kelelo doolopa laTsandi onghatu yakula notai kwafele ovakalimo vomodoolopa unene tuu ava vomangeshefelo opedu.

“Onda hala ovanangeshefa aveshe vomangeshefelo opedu va tale ko omhito ei ongomhito yokulonga noudiinini, nove lipake mo ngaashi va kala ve i hala nove i teelela efimbo lile,” ta ti.

Ndapandula Elago umwe womovalandifi vomangeshefelo opedu okwa ti, vo ova ninga efimbo lile tava fi omutenya neenghono. 

“Omunhu ku na lela okatala ke shi okulinekelwa shaashi ou li ashike koshi yokanduda. Odula, outalala, omhepo nomutenya aishe oko ashike hai pwile kufye oko kwa li,” ta ti.

Okwa ti meni lomatala avo ape, okuwete kutya ongeshefa yavo otai ka enda nawa, notava ka mona oshimaliwa lela shi li nawa. 

Okondalaka yokutunga vati oya li ye linekelelwa ovatungi vehangano loCascades Enterprises, nova longa lela oilonga yongushu yo oi shi okulinekelwa.

-taimihaihambo2000@gmail.com