Ovanamibia mave sokuungura ovikurya vyawo oveni okuhenununa omaṱaṱero wehi kokuiisa ovihepwa okuza pendje.
Omuute wotjiungura tjotutumbo novikunwa itji Oroots Agricultural project mOstampieta, Johan Rieckerta, wa tjere nao Oritjatatu rotjiveke tji tja zuko. Operesindenda yokehi ya Namibia, Lucia Witbooi, tja karyangererere otjiungura itji. Rieckerta ma tja Onamibia nai ozoperesende o-85 zovikurya ri isa okuza kOsouth Afrika tjeri otjiṋa tji tji ṱuna kombwiko yehi ngandu kotjimariva tjaro.
“Otjimariva tji tja zu mozongoporo; ovayenda novaryange notupa twarwe tji ungurisiwa okuhitisa oviṋa mehi okuza pendje tji tji ṱikonaparisa ombwiko yetu.
Matu sokuyandja omasa koviungurwa vyomonganda, kokutja tu ṱizire monganda nokutja otjimariva tji tanauke mOnamibia, nokukuna ovikurya vyetu oveni,” Rieckerta ma tja nao.
Na raisa kutja pe na ozongunḓe ndatu nḓu maze yenene okuyandja omasa kombwiko, nḓeri Otutumbo nOvikunwa; Omahongero novimariva vyouye wopendje. Na handjaura komurungu kutja Onamibia mari hepa okuungurua ovikurya vyaro orini, kokutja ri tjite nao mari hepa omahongero nomekurisiro wounongo wokuungura mOtutumbo nOvikunwa, na wina omaweziro wonḓengu okumema oviungura okuvatera okukareka ombwiko.
Ongunḓe osenina otjimariva tjouye wopendje tji matji tara kohepero yOnamibia okunanena ovapwikire kuro na muro kutja ve yete otjimariva tjopendje mehi.
Rieckerta otji ma toko Ovanamibia okuungurisa onḓikameno tjingeyo ovo nomuzapamwe we Salomon Kambala, motjiungura tjavo ndji va ungurisa ozombura omurongo nḓa kapita mokutanaurira okarongo ka Stamprieta mokasavero kOtutumbo nOvikunwa nomamemeno woviungura.
Otjiungura ihi Oroots tji novaungure o-350 ovengi vokarongo okeni nongondoroka yako mOkarukondwa komatoororero ka Hardapa.
Mbe kuna ovihape novikunwa pekepeke motjikunino tjozoheketara ape o-30 motjikunwa poo otjihape atjihe mu mu nowuupa; oviyapera momandjembere. Wina tji ungura omihao vyatjo tjini novikurya vyarwe mbi randisiwa mozokesi.
Komurungu tji ungura ovinguma noviugurisiwa vyatjo otjini tjimuna omainya wozonḓu ovyo mbi randisiwa pendje nehi kOmahi Omakutasane wa Amerika.
Tji tumba ozombinda na wina ozohunguriva o-300,000 muzo o-10,000 meyuva nḓe ṱa naze randisiwa kozonamiti nozosikore. Nampa