Taimi Haihambo

Omauliko opaipindi aHelao Nafidi neudo okwa tokola okweeta omalihafifo kovanhu veedula adishe. Okudja ngaho kounona vashona fiyo okovakulunhu, kape na ou ta shuna keumbo a nyemata.

Mayola wodoolopa yaHelao Nafidi Darius Shaalukeni okwa ti omauliko opaipindi okodula okwa tameka onghela, nokwe ya a xwama neudo.

“Ngeenge otwa tameke nokuli komalihafifo ounona otu na ko oma ‘jumping castle’ oo e holike kukeshe okaana. Ounona natango ove na ko omaudano ngaashi omakulikwa, eenhele dokuyowa osho yo ovanangeshefa ava tava ka kala tava landifa oudanaukifo kondado i shi lela okulinekelwa,” ta ti.

Okwa twikila kutya natango oshivilo otashi ka eta omwenyo kovashikingalo vakula nove holike moNamibia okudja mo 31 Kotoba fiyo omu 2 Novemba.

Mo 31yaKotoba vati omu na omushikingalo oo a shivika nawa nedina King Tee Dee, oo ta ka kala omukwatelikomesho weengalo pamwe novashikingalo vopomudingonoko vooLegend Boys, Tango Khalawa oshoyo P-Fresh.

Mu 1 Novemba omu na Exit oo ta ka kala fimba i na ongodi pamwe nova shikingalo vopomudingonoko vooKastyle Ndonga Boy osho yo oo The Vocalist.

Mu 2 Novemba omu na Young-T oo ta ka kala mwene wosheendo pamwe novashikingalo vopomudingonoko vooWarforce osho yo Neli Light.

“Natango ohatu ka kala yo tuna omaudano okeemadi eetima dopo mudingonoko,” ta ti.

Okwa ti otai ndile ovadali vaete ounona komauliko opaipindi opo vadule oku tyapula omalihafifo aa. Ovanyasha navo naveuye va hafele pamwe.

-taimihaihambo2000@gmail.com