Okomisi yomahogololo moshilongo yedhina Electoral Commission of Namibia (ECN) oya shilipaleke Aanamibia kutya omalongekidho gomahogololo oge li metifa.
Aanamibia oyendji oya ndhindhilikwa nokushangithwa ya kuthe ombinga momahogololo ngoka ge li ko momasiku 26 gaNovemba nuumvo, opo ku tokolwe ookansela taya ka lela miikandjohogololo osho wo momalelo goondoolopa moshilongo ashihe. Omukuluntu gwokomisi yomahogololo moshilongo ECN Peter Shaama okwa ti oya longekidha omahala ga gwana gomahogololo oshilongo ashihe.
“Omahala gokuhogololela otaga ka kala ga andjagakanithwa miikandjohogololo ayihe yi li 121 moshilongo. Okwa ndhindhilikwa aantu ye li 1499 449 yi inyolitha okuhogololo aaleli yiikandjoogololo 121 osho wo yeli 752 043 yi inyolitha okuhogolola aaleli yomalelo goondoolopa ge li 59,” ta fatulula ngaaka.
Okwa fatulula wo kutya nuumvo otapu ka longithwa uushina wokundhindhilika uuyelele awuhe, notapu ka kala omilandu opo ewi lyi vule okuyalulwa,” Shaama ta fatulula ngaaka.
Ta ti, oshinima shoka shi li po, ooshoka kutya, Aanamibia oye na okuninga etokolo lyehogololo lyawo ndyoka tali vulu oku ka kala lya eta elunduluko moonkalamwenyo dhawo muule gwomukokomoko gwethimbo ndyoka omuulikwa taya hogolola takalela.
Shaama natango okwa tseyitha kutya omasiku 26 gaNovemba otali kala esiku lyefudho lyopashigwana moka Aanamibia ayehe mboka ya adha iipumbiwa taya pewa ompito yokuhogolola.
“Momasiku 26 gaNovemba moka, kehe gumwe okwa pitikwa a hogolole.
Oosenda mpoka tapu ka hogolelwa, otapu ka patuluka okuza 07h00 yongula sigo 21h00 yuusiku,” ta ti ngaaka.
Ta popi ta ti, kape na nando omuntu gumwe ta ka pitikwa, a hogolole konima yowili ndjoka onkene oosenda otadhi ka pata mbala konima yowili ndjoka ya dhenga.
A kumagidha oshigwana shi meleke nawa nomondjila pomuulikwa gwehalo lye, ngaashi naana ya longwa nenge ya ulikilwa, ihe haku kwatela kumwe uumboloka.
“Kehe ombapila tayi ka kala yi na omapuko, itayi ka longithwa, ewi ndyoka otali ka ekelwahi. Aantu naya kale ye na ontseyo nkene ye na okuhogolola mondjila, naangoka ta ka nyengwa na pule omakwatho kaanambelewa,” ta kumagidha.
Hugunina okwa kwashipaleke kutya kape na ewi tali ka yalulwa uuna omuhogololi inaa landula omilandu adhihe dhomondjila.
-vkaapanda@nepc.com.na