Auleria Wakudumo
ONGWEDIVA – Omikunda dihapu konooli otadi lilongekidile omaudano oo haa kala ko unene muDesemba keshe kodula.
Young Stars Football Club nedina limwe Orange Nation yomomukunda Okakwiyu mOnayena oye lilongekida okukala i na omaudano okomudo pokapale kavo momukunda Okakwiyu.
Omaudano okwa kwatela mo etanga lokeemhadi nokufanga eepenandi. Omaudano otaa ka kala ko okudja mo13 fiyo 14 Desemba 2025.
Omukulunhu woYoung Stars Reinhold Amadhila okwa holola kutya elishangifo opo u dule okukufa ombinga moudano ou, otali pula N$950. Ongudu ei tai ka vena po omaudano otai ka vena N$10 000, ekopi osho yo eembadi doshingoli 18, ava tave ya poutivali otava ka vena N$6 000 neembadi doshisiviveli 18 omanga ava tave ya ponomola ititatu naitine tava ka vena N$1 500 keshe. “Omaudano otaa ka kwatela mo yo okufanga eepenandi odo tadi lishangifwa koN$400. Ou ta ka vena ota ka mona N$3 000, taku landula N$2 000 osho yo N$600 oyo tai ka venwa keengudu detanga mbali daxuuninwa,” Amadhila ta holola.
Amadhila okwa holola yo kutya otava ka yandja eembadi koohandimwe ovo va dana nawa ve dule vakwao ngaashi omudani dingi navakwao.
Young Stars ota ka unganeka omaudano oshikando shititatu mondjokonona. Poshiindingili otapa ka kala yo oipindi oyo tai ka kosha N$400 okatala kokulandifa.
Young Stars ongudu yetanga, ya totwa mo2018. Ongudu oi na ovadanitanga vamwe ovanafikola, ovalihongi koiputudilo ya yooloka novanashilonga vomaifano a yooloka. Young Stars oha dana pamufika wopombada noku li mo3rd Division hano e li kongudu onhinatu metanga moshitukulwa shaShikoto.
Amadhila okwa ti otava longo noudiinini opo va waimine ongudu onhivali mOshikoto.
“Nonande enenediladilo okuya kongudu yotete mOshikoto, paife shaashi out li kongudu onhinatu, ohatu lalakanene okuya kongudu onhivali opo nee hatu ka kufa ko vali eenghatu tu ye kongudu yotete,” Amadhila ta holola.
Okwa weda po kutya ongudu yaye oya taalelwa komashongo ngaashi oshimaliwa. Okwa ti ohava kala ve li momhumnwe yoshimaliwa unene ngeenge tava ka dana keenhele dokokule ngaashi Omuthiya, Oniipa Onyaanya nadikwao vali.
Amadhila okwa indila ovanangeshefa naaveshe ovo ve na ehalo metanga unene lokomikunda opo va dule okuwanifa po eemhumbwe dovadanitanga ngaashi eenghaku dokudana, noshimaliwa shokulongifwa ngeenge tava i komaudano komaumbo.