ONGWEDIVA – Osipana yomaudhano tayi ithanwa Ongulumbashe Diamond Football oya yambindhindhwa noshimaliwa N$50 000 kehangano lyedhina ALV Consulting Engineers. Regina Sheehama go-ALV okwa ti ehangano ndyoka olya yambidhidha ngaaka nelalakano lyokuhwahwameka omaudhano.
“Okugandja omayambidhindo ge li ngeyi oshitopolwa shehangano lyetu, onkene ohatu yambidhidha mboka ye li mompumbwe osho wo mboka twa ndhindhilike taya pumbwa omakwatho,” ta fatulula ngaaka.
Sheehama okwa ti ehangano lyawo olya ndhindhilike wo kutya ngele taya yambidhidha aanyasha otaye ya longekindhile wo onakuyiwa ombwaanawa.
Ta ti, ehangano lyawo otali tsikile okuyambindhindha aanyasha opo ku vulike okutothwa mo mboka ye na iitalenti, ya vule okweeta po omalunduluko moshilongo.
“Otwa hala wo okukumagidha omahangano moshilongo ga kale taga yambidhidha aanyasha opo ya vule okuulika iitalenti yawo,” ta pula ngaaka.
Omukwatelikomeho gosipana yomaudhano Ongulumbashe Diamond Kristof Aipanda okwa ti oya pandula sho ya yambidhidhwa ngaaka naasho oyo ya ningi aanelago okutothwa mo.
“Oshimaliwa shoka twa pewa otatu ke shi longitha okukandula po oompumbwe osho wo omaupyakadhi ga taalela osipana yetu, opo tu vule okutsikila nomaudhano getu,” ta ti ngaaka.
Aipanda okwa ti oku na etimaumbwile osipana yawo oyo yotango tayi ka dhanena Premier League okuza koshitopolwa shaMusati, onkene otaya kwashilipaleke kutya oye na okukadhana neyitulemo opo wo ya nyanyundhe oshitopolwa shawo.