KATIMA MULILO – Kitaba ye zibahala kuli kalilimo zeñata mabasi ni bakuli mwa sikiliti sa Zambezi bana ni kutalimana ni misipili yetomohisa lipilu, kunga misipili yelikana libima ze myanda iketalizoho kuya kwasipatela kwa Rundu, ni ye fitelela sikiti kuya kwa lipatela kwa Windhoek kwa likalafo sakata. Misipili yeo ikonile kuimeza mabasi hala masheleñi ni maikuto mane fokuñwi kutisa mafu.

Likwambuyu wa Makete ni Pabalelo ya Sicaba ili ñaka wa sipatela Esperance Luvindao, ubulela kuli kunanula sipatela sa Katima Mulilo, kuli sibe sipatela sesina ni lisebeliso sakata kutokwa tahiso ya lisebelezo zecwale ka babeleki, kuyandulula miyaho nikubona kuli lisebeliso ni minshini sakata yetokwahala mwa sipatela liba teñi.

Nabulela kanako yakukwalula muyaho obabalela bakuli babatokwa pabalelo yetuna (ICU) Labune, mi naize kukwalulwa kwa muyaho kimuhato mwa lineku leli lukela, kubona kuli sipatela sa Katima Mulilo sa huliswa.

 Luvindao na ekelize kuli kuyandululwa ni kubakanywa sinca kwa muyaho mokulobazwa bakuli babatokwa pabalelo yetuna, kone kukonahalile kabasheleñi alikana bolule babalalu ni licika (N$3.5 million), kibubaki kuli mubuso uitamile kubona kuli batu kaufela kusabilaezi kobafumaneha mwanaha Namibia, bafumana lisebelezo sakata za makete. 

“Ona muyaho wo, ki likepe le linca teñi lisebelezo zamakete ze zwezipili likana lifiwa ona mo mwasikiliti sa Zambezi. Kibupaki tuna hala tiisezo yaluna yakubona kuli makete asicaba afita kai ni kai, kubona kuli sicaba kaufela bafumana lisebelezo zamakete kusina kusinyehelwa hahulu masheleñi amañata,” nekubulezi Luvindao.

Nabulezi hape kuli kibupaki kuli mubuso uitamile kuzwisezapata makete sakata mwasikiliti sa Zambezi ni libaka zeli bukaufi. “Ona muyaho omunca mokubabalelwa bakuli babatokwa pabalelo yetuna, u ekeza mimbeta yelobapeli kwa mimbeta yelikana 264 yefumaneha mwasipatela sa Katima Mulilo. Muyaho utaha ni lisebeliso sakata zamakete ni macaziba sakata ba ba itamile kubelekela sicaba nako kaufela,” nabulezi.

Mwasilimo sesi felile bakuli babalikana 214 nebatokwa pabalelo yetuna kwa sipatela sa Katima Mulilo. Hala bona babañwi nebakula hahulu mi babañwi nebakula matuku atokwa kupazulwa. Luvindao naize linombolo zeo lisupeza kuli kuna ni tokwahalo yetuna ya lisebelezo za makete kwa sipatela sa Katima Muililo. Kacwalo muyaho okwaluzwi ukabapala kalulotuna kubona kuli bakuli bafumana lisebelezo za makete zelukela.

“Muyaho okwaluzwi uyemela kuzwelapata, buikuhumuso ni sepo. Kulufa lianga lakuli lubeleke katata ni kaswanelo, luze lu supeza musa ni kueza hande mwa misebezi ya luna. Kikalibaka leo kuketilwe sikwata sesina ni tundamo kuzamaisa muyaho wo lihola zemashumi amabeli kazene za lizazi, ni mazazi asupile aviki kubona kuli pabalelo izwelapili,” nekubulezi Luvindao.