Auleria Wakudumo
OSHAKATI- Oudano wokuumba ouhandja oo wali wa unganekwa koMTC Kilimanjaro Northern Amateur Boxing Club owa enda nawa.
Oudano wa tya ngaha owali wa unganekwa okudja Etitano fiyo Olomakaya mEkuku, mOshakati.
Omudeuli womukwateli komesho woMTC Kilimanjaro, Joseph Bernhard okwa holola kutya elalakano lokuunganeka oudano ou okutala kutya olyelye ependafindani moshivixa keshe.
“Osha enda nawa lela. Otwa mona eengudu da fika po20 odo da kufa ombinga. Ovanhu va kufa ombinga ovali va hevela pe100,” Bernhard ta ti.
Bernhard okwa ti oudano owa li una okukwata omafiku atatu ashike ova ka umba ashike eengonyo, oule womafiku avali, Etitano nOlomakaya.
Oudano ou owa li wa nhuninwa ashike eengudu dokonooli omo oitukulwa ngaashi Ohangwena, Omusati, Oshana, Oshikoto noKunene da kufa ombinga.
“Eengudu edi onde di eta pamwe opo ndi mone kutya eshi hadi ufena ovanhu vado, olyelye enyakwa mokuumba ookahandja moshivixa keshe,” Benhard ta fatulula.
Eengudu eshi da fika, omakondobolo okwali taa li ehete, omo twa mona kutya oshivixa keshe otashi pangelwa kulye moitukulwa yokonooli itano.
Okwa venwa omakopi avali, ekopi loJunior noSenior oshoyo ekopi eli la kula.
Ekopi lojunior ola venwa po kokamatyona umwe ha denge eenyonyo da indikwa nokovakulunhu,a dja koMTC Kilimanjaro Boxing Club, losenior ola venwa po komuumbi weengonyo okudja kOkahao Boxing Club omanga ekopi eli la kula la venwa po kongudu yoMTC Kilimanjaro Boxing Club molwaashi oyo yina ovafindani vahapu.
Bernhard okwa koleka kutya oudano owali uli momhepo iwa. Okwa pandula Ovashakati naaveshe va dja keembinga da yooloka eshi va kunguluka okutala nghene iikesho hai umbwa.
“Ohatu pandula ehangano lomakwatafano, MTC eshi hali kwashilipaleke ashike kutya ola yandja omakwafo opo tu dule okudeula nokutofa ovadengingonyo konooli,” Benrhard ta ti.
Bernhard okwa indila ovanangeshefa ava veli mendoolopa omo hamu di eengudu domaudano eengonyo ngaashi Otsandi, Okahao, Opuwo nadikwao opo va
yambidide eengudu edi opo ounona va kale have li deula peenhele dili xwepo pena oikwafifo aishe.