Ministers, !Hū-omkhâis tsî !Hūde ǁKhwa Kō!gâs dis, Inge Zaamwanis ge ǂoa ge wekheb di Wunstaxtsēs ai ge ǂanǂan, Afrikab di ǀgui !khai-i ai ǁanhâ tama !aedan Zambezi ǀkharib !nâ khoraǂuisen hâ !khaisa. Ministers ge nē ǂanǂansa !Haosi ǂNûs !nâ dī tsî ge ǂan kai sao ra !ādi nē mâsib xa tsâǀkhāhe hâ !khaisa, ǂgaiǀons ai Kasayas, Nakabolelwas, Luhononos, Bukalos, kabbes, Muyakos, Masokotwanis tsî Linyantis hâde.

“Sadu ǂans !naka ta ge ǁkhōǁkhōsa khoraǂuisens Afrikab di ǀgui !khai-i ai ǁanhâ tama !aedan Zambezi ǀkharib !nâ khoraǂuisen hâ !khais disa ra hā-ū,” tis ge ministersa ge mî. Zaamwanis ge mîs ge dâu!khūde xu hâ ǁgam!khubidi, Muyakos tsî ǀOro Masokotwanis hâra tawa di nē !haese tsî !khausase khoraǂuisens nē !aedan disa ge !aromasa, nē !khaigu xoxon ǁoraguba ra ǀgaigaise a ǂansa xui-ao.

“Khoraǂuisens nēs ge !hūb ai !aemas tsîǀgapise ǁkhanamas hâra !harode sī!nâ hâ tsî nēs ǀkha ǁîna !khō!nom!noms !aroma ra dītsâhe mâsiga ra ī­khā kai tama i,” tis ge gere mî. Ministers ge mîsa !oas ge ministerisa !nona !nande ge sîǂui ­khaubas sîsengu ǀkha ge tsoatsoase. ­ǁÎn ge !nona Land Cruiserdi, hû ǀiri-ūdadi hîa ǁnā autodi ai a !gaemâisadi tsî !omgu ǀkha nî ǀiri-ūhe masindi tsîna ūhâ. “Nē dītsâde ra hui!nâses ge ministerisa hāǀaro ra audona ge ǂgan, Direktorats ǀGoaǀae!khōs !Oabadi dis tsî ǀHûǁarebese ra ǁAnaihe tsî ǂGari-aihe !Hū!âis Proxrammi !âba xus tsîna. Nausab, kaisib nē khoraǂuisens diba ǂhabase hâ ǂkhâ!nâsa ǂhâba hâ xawe,” tis ge ge ǂan!gâ.

Ministers ge ­ǁkhaukhâisa nau hâ ǂhanub ǂnûiǂgādi, ǀkharisi ǀawemā!nandi, !ā!nāsi ǂgaeǂguidi tsî aitsama mâbasen ǂnûiǂgādi ai ge dī,khoraǂuisens ai ra dītsâhe ǀgaugu !nâ ǂkhâ!nâsa. “Sida ge !hao!nāsi ǂgaeǂgui-aon tsî ǀhûhâsigu ǁanin ǁnā tsâǀkhāsa !âgu din ai ǂgansa ra dī, in ǁkhaubasens ǀgauga sîsenū tsî tā ǀiri!āb xa ǁōǁgoe xoxona tsâǀkhā, ǁîna ǂûs tamas ka i o ǀnî hâ !aroma-i !aroma sîsenū ǂgao,” tis ge gere ǂgan.

Aiǂnû-aob, Zambezib ǀKharisi ǀAwemā!nans dib ge nausab khoraǂuisens mâsib ama tama ti gere mî, soab ai ge !gara!ā, nēs hoaǁae ǂgari-aon ra !hanagu âna ǁnaetisa ǀasa !hanaǂgās !aromara aiǂhomi ka !khā!khuri ǁaegu !nâ ra īsa. ǁNā-amagas ge nē !nandi di ǁaxasigu ǁkhaubas nē !aedan dis !oagu hâsa, ǁnāpan !kharu ge ǀnanuǁaeb !nâ ge ǁgoe-aihe !upuditsî nau ǁanǁare!hūga xu ra doeǂgâxa !aedan ai ra ǂâisa ǂnûise. Ai!gûgaru ǀiridi ǁaxasigu ge ǁora!khaigu ti a ǂansa !âgu, ǂgaiǀons ai Kasayas, Nakabolelwas, Luhononos, Bukalos, kabbes, Muyakos, Masokotwanis tsî Linyantis hâdi !nâ a ǀhawe ūhe.