Khoekhoegowab, Languages

N$3miljuns ge ICUs ge Katima Mulilos ai go sîsentsoatsoa-ūhe

2025-11-042025-11-04By Correspondent
N$3miljuns ge ICUs ge Katima Mulilos ai go sîsentsoatsoa-ūhe

Michael Mutonga Liswaniso 

KATIMA MULILOS – ǂUrusib tsî ǀHûhâsi !Oabadi di Ministers, Dr Luvindao Esperance ge ǂoa ge wekheb di Donertaxtsēs ai ǂhanusise dī-ūnusa !khaib, Kaise ǀAesenhâ ǀAe-aon ra ǀAe!khō!nâheba (ICU), Katima Mulilos ǀKharisi ǀAeǁgâub, Zambezi ǀkharib dib tawa gere ǀhui-am. 

Nē !âb hîa N$3.5 miljun maris ai ge !gâi!gâi!nâheb ge hāarorase ǁkhaisa kharoga ge hō, ǀnai hâ 264 kharogu ai ge ǀarohese. 

ǁKhātin ge ǀgapiǀgauxa tsî ǀasa ǀae!khōs ǀgaugu !aroma a ǂhâbasase ǀae!khō-ūxūn tsî ûiba sâus !aroma a ǂhâbasa ǀae!khōs sîsenǀgauga hui!nâs xūn tsîna ge !khō!oa. 

Luvindaos ge îs di gowaǀîs !nâ ge mî, gaxu ǁaeban Zambezib ǀkharib khoena !gomma tsâ hâ !khaisa, ǁkhōǁkhōsa ǀae!khōdi ǂnamipe. 

ǀAokhoena tsî ǀae-aon tsîn ge kaidisidi !nâ hâ kilometerga Rundus tsî ǀAeǁgams ǁga nē ǀō-aisa ǀae!khōdi !aroma gere !nari tamas ka i o !nari-ūhe tsîs ge nēsa marisise ǀgaisa ǁgâiba gere ǁgui tsî nēs ǀkha ǂurusib tsîna îbe gere khao-oa kai. Ministers ai!â ge mîs ge, ǁkhowa-ams nē ICUs !âb dis nē ǀaeǁgâub ǂurusib ǂgaoǀkhādi ai dīǀoaǀoasa ge īǁkhā kai tsîs ǁîsa nēsisa a ǀkharib di kai ǀaeǁgâu !khaisa. 

“Nē mûǂuib ge sida ūhâ ǀaweǁguigu, Katima Mulilos ǀAeǁgâuba ǀKharisi ǀAeǁgâub !harosa xu ǁNaeǁgauǀî ǀAeǁgâub !haros kōse sī-ūs dis ǀkha ra !gûǁare. 

Nē ǀaweǁguigu a !khōǂgāsa, Ministeris Dana ǀAweǁguib !nâ tsî ǁkhāti !Naniǁî !Hū!nāsi Omkhâisens ǀAweǁguib (NDP6) !nâs tsîna,” tis ge ge mî. 

NDP6 ǀkhab ǂhanuba ūhâ ǁgūbas ge, ǀō-aisa ǀae!khōsa ra ǂgaoǀkhā ǂurusib !oabade khoen tawa sī-ūs, ǀoroǀoros kai !ādi ai ǀgui nē !oabadi !aroma nî !gâsense isa tsî nē ǂhâǂhâsa !oabade ǀhûhâsigu hîa îbe-îbe nēna ǂhâhâga sī-ūbasa. 

“Nē ǀaeǁgâub, !gōsase ICUs !âb ge a ǁgauǁgau, ǂhanub di ǁguiǂgāsens ǁîb ǀaweǁguiga amaga kais disa, tsî ǀgui khoe-i tsîn khaohâ kaihe tide tamas ka i o ǁaraǂuihe tidesa mâpa ǀgui-i ka ǁan xawe, nē ǂhâǂhâsa ǀae!khōs oabade hōs ǂnamipe,” tis ge ministersa ge mî. ǁÎs ge ǀams ai ǀaeǁgâub di ǂgaeǂguisa ge ǂgan, hoaǁae ǁîn sîsenni !nâ hâsa tsî îs ICUsa ûiga sâus ǀkha ai!gû tsî !goaxa surigu di !âubasens ase ǂurusib !oabadi ǂnamipe hâ.