Taimi Haihambo 

Opolifi oya tula omulumenhu weedula 38 moipandeko, oo ha longele ehangano lEyambeko Namibia Catering Services moTsumeb moshitukulwa shaShikoto, olo li na oshinakuwanifa shokuandjakanifa oikulya komihandjo. 

Ouyelele u na sha noulunga woikulya yomomuhandjo owe ya koluhaela konima eshi ovakulunhu vokehangano lEyambeko va pewa okamufofodolo kutya ope na oikulya yokomihandjo tai landifwa mOndangwa ko Extension 17. Konima ovakulunhu vehangano ova nhofela ko opolifi yomOshana opo i ye koshiningwanima. 

Opolifi vati poshiningwanima oya hanga po oikulya i na ongushu yoN$32, 716, ashike omufekelwa ka li po manga efimbo olo. 

Oikulya ei ya hangwa tai landifwa vati omihaka edi dakula di li 36, omavela ondjema eelitela 20 e li avali, ombelela yongobe 20kg, oupakete 16 vomashiishini, oupakete vanhe vomai aa haa kala mo o30, oipakete 16 yeeshi o30endooxa nombelela yongobe ya nyanyaulwa yo 80kg. 

Konima ashike yefimbo lixupi eshi oikulya ei ya monika, opolifi natango oya pewa omufofodolo kutya omufekelwa natango okwa teelelika a ete oipakete yeeshi konguloshi vati. 

Omufekelwa eshi a fika ngeno vati a yelule ostoka yaye, eemwiya daShinana okwa hanga nale de mu teelela ponhele apa te ya okuhelulila. 

Ponhele yoshiningwanima vati okwa fika po notuwa ilaula yo seven-seater, nokwa li a humbata oundini vo 5kg vomaadi okuteleka vavali , oupakate vanhe veeshi domondooxa, oshako youfila wepungu yo 100kg, oshako yosuuka yo 20kg, oshako yomacoroni yo 50kg, osho yo oshako yolwishi yo10kg. 

Omufekelwa vati okwa holoka nale momhangu oshivike eshi, nomakonakono opolifi otaa twikile. 

-taimihaihambo2000@gmail.com