GOBABIS– Aalumentu yatatu oya hulitha moshiponga shohauto mOlyomakaya lwopotundi 03h00 yokoongulasha moWindhoek sho anuwa nakuhinga a li a kanitha okondolola yohauto.
Olopota yoshiponga ndjoka ya li ya gandjwa kopolisi yaNamibia oya ti kutya oshiponga shika osha ningilwa poB1 kondjila yoWestern Bypass pokati koshipangelo oshinene shaKatututra naashoka shoCentral, tayi ti kutya nakuhinga, omunamimvo 31 ngoka a li ta hingi ohauto yoPolo GTI okwa li a kanitha okondolola nokwa li a imbotso mongudhi yontopa noshihauto osha galangata, noshe mu dhipaga pamwe naafaalelwa yaali mboka ya li mo.
Shi ikwatelela kolopota, mbaka yatatu oya li aniwa ya monika lwahugunina pokalaba koProsperita naanuwa oya li ya monika taya hingilile taya tidha ohauto yontumba yoAudi.
Mbaka yatatu oya tongololwa no oyo Francois Lottering (omuhingi), Mark KrÖner (31) namumwayina Carloton KrÖner (33). Aapambele yoonakusa oya tseyithilwa.
-Nampa