Muzamaisi yomuhulu wa liluko la tuto Sanet Steenkam, ubulela kuli ticele ni ticele uswanela kuba ni mulelo wa kuyolisa nako, ili kuli baituti bane basaswanisi kukena lituto zapata ka pata bakone kuzamaelela ni babañwi. Kuzwelela lituto zalitopa za 0-3 halitateka viki yefelile, buñata bwa likolo mwanaha kaufela neli palezwi kulatelela milao ya makete kanako ya kakokwani ka Korona, kacwalo neli palezwi kukwalula. Mayemo awo akaswana atepelela sina baituti balitopa za 7-9 habana ni kukalisa lituto zabona kachenu. Balitopa za 4, 5, 6, 8, ni 10 balibelezwi kukalisa lituto zabona la 3 Muyana.

Steenkamp naize likolo zesina limbuzi sakata ni mezi akena, ili kone kusika fumaneha tatululo kapilipili neli sika kwalula kabunako. “Kuituta kone kuezahezi sapili kuka zwelapili, mi ticele ni ticele uswanela kuba ni mulelo wa kupulusa mayemo atuto. Likolo liziba kuli lina ni kuyolisa nako yene latehezwi. Lutalimile sinca mulao ozamaisa tuto, mi kanako yeswana lutalimile ma pesenti. Lutahisize hape kuli misebezi yefiwa kwa baituti ina ni kuzwelapili,” nabulezi. Ubulela kuli liluko lizwelapili kundwendukela mayemo, mi lilibelezi kueza mukopano ni bazamaisi batuto mwalikiliti, kuli kufumanwe kuli kuzwelwa cwañi pili. Lituto kaufela litekezwi kufela la 18 Ñulule. 

Nihakulicwalo, kuna ni mayemo aketahani hala likolo zefumaneha mwalitolopo za Walvis Bay, Swakopmund ni Arandis, ili teñi kuituta neku yemisizwe bakeñisa milao yebukiti yakufukuza kuambalakana kwa kakokwani ka Korona, ili yekafela la 3 Muyana. Bakeñisa kuli banana kamita haba bonisi lisupo, macaziba babulela kuli kukwalula likolo kukaswana kwabeya mayemo amaticele, limembala zamabasi, ni sicaba kabupala mwakozi. Liluko litiiseza kuli kukutela kwasikolo kwabaituti haki kwa kapelezo.

Nikuli maticele bakafa lisebeliso zatuto kwabashemi baba kaiketela kusiyalisa bana babona kwandu. Steenkamp napalezwi kupatulula kuli ki likolo zekai zene palezwi kukwalula bakeñisa kutokwa makete sakata. Kono naize nombolo yabaituti kwalikolo inze imbweshafala zazi ni zazi. “Kuna ni lipilaelo kwaneku la luna kuli nombolo ya baituti balitopa zamakalelo kiye nyinyani. Lusa sweli kuamuhela lipiho kuzwelela mwalikiliti. Kutata kakuli buñata bwa likolo lifumaneha mwalibaka zamatakanyni,” nekubulezi Steenkamp.