Ombongo ndji Ost Joël Apostolic Mission Healing Church ya tye okuteya Omaueuozonjanda etambo ovimbumba novimumba omayuva womasuviro nga tji mavi undjirwa mutjo.

Ozondjira za utire okuhungama kOmaueuozonjanda tja Pukiro nu zarwe tjingetjo omayuva womasuvuiro nga maze hungama ngo ovimbumba novimbumba mbi hi ya sekama tji mavi tjiti nao okukerikwamba kuvyarwe. 

Komukandi womazemburukiro wozombura o-50 zomasembamisiro nonḓikameno yOmbongo yOst. Joël nai yotjiuru tjayo Mbitjopa Theo Pura. 

Ku imba ku mave kerikwamba amu nomuhonge Pura omuini nguri kokutjita ouatjiri kokutja avihe viri kehi yondyero ndji ri yo nu mavi kawondja otja kondyero nonḓero. 

Orutu oruharupu Okahengava, ndu tjiukirwa kokupitisa ovitjitwa pekepeke ovinamuinyo korukwiko, tjinene vyozombongo nozongamburiro pekepeke ngandu nambano ndwa handjauka okupitisa ovitjitwa pekepeke tjimuna ozombakero nomikandi, Omandaha rwe rikwambere komarongerisiro womukandi wozombura o-50 imbwi tji rwa raisire ouharupu rwaro noviyandjewa komukandi mbwi. 

Muvyo mu mwari ovihavero novikurya novitarareke tjimuna omeva. 

Potjitjitwa tji pombongo mOtjomuise, movengi okuza Kokahengava pari Omuhaamise wOvihavero vyayo wina nguri Otjiuru Otjipitise, Omutengwa Kamburee Kahengava , na Mama Cathy Katrina Katjipi. 

Ombitjopa Menongongo Kandovazu, Omuuke Kavendjii Tjahuha, Ozombitjopa Tuandjeua Iyambo , Boas Tjiramba, Daniel Kaverua nOmuuke Collin Mbaukua omba yakurire onguta ndji. Pu pa ri ouṋepo wokowa yOst. Joël nau yandja eraa rapeke rondjoroka yondangero nomaimburiro. 

Kahengava wa yandjere ongwizikiro yorutu ndwi Okahengava momeriyandjero omahapokere kokuyandja oruyameto kotjiwaṋa novitjitwa vyongamburiro vyokuyeura nokuwaneka ovandu. 

Movaute vombongo oyo ndja utirwa mOhakavena tja Pukiro muna Ombitjopa Kandovazu na Mama Kanguatjivi. 

Mo 2012 oyo mOtjomuise ndjaa ihitire motjiranda uriri otji ya patutura ombongo yozohima.