Nambano ondja rira ongaro poo oombazu mokati kotjiwaṋa tjOvambanderu nOvaherero okuzemburuka ekuruhungi, omayuva womasuviro woviveke vivari mbya kapita imbi tjeri otjiṋa tji tja yarukire po.
Ovambanderu tji va zemburukire ozombura esere zorutjindo rwavo okuza mOtumbo twohuurire okutoora ozondjira pekepeke. Tjeri otjiṋa tji tja utire mu Kambundu ombura ndjazuko orutjindo rwa Pukiro rOvambanderu tji rwa zemburukirwe mozondi mbari. Tji tjiheri otjiṋa otjizuvakwa nungwari mena rohaṋi nokaṋa.
Ombura ndjazuko Ovambanderu va zemburukire ozombura esere zorutjindo kEpukiro oro ndaaru varwa otjorujtindo rOvambanderu uriri ngunda otjimbumba tjarwe tjOvambanderu nOvaherero atja zemburukire orutjindo tjingero katjisupi, ape otjiveke nao kombunda ya ingo omatenga ngari kehi yOuhonapare wOmbazu wOvambanderu.
Ngari mayuva womasuviro womayandero wa Seninaṋi okuuta Tjikukutu mo 2024. Ngunda ingo wOvaherero nOvambanderu avehe pamwe ayari momautiro wotjiveke tjomautiro wa Tjikukutu ombaru ndjazuko.
Tjingetjo mozondambo zohaṋi nḓa omu mwa kongorerere omazemburukiro wozombura esere zorutjindo rOvambanderu kOmongua mo 1925. Ombara Otjitambi yOvambanderu, Karikondua Nguvauva, ava kazemburukire ozombura esere zOrutjindo indo omayuva womasuviro womueze mbwi tji ya ri o-17-19. Nu kehi yOmbara Tjozohongo II Nguvauva, ava kazemburukire omayuva womasuviro nga zuko omayuva tji ya ri o-24-26 komueze mbwi.
Ovitjitwa aviyevari mbi vyari novinyoko vyavo okuza movitjitwa vyombazu mbya tjama komayamberero ngandu komayambekero womake kovaheṋendu vomuhoko. Otjimbumba tjOmbara Otjitambi Karikondua Nguvauva tji tja twiririse ngu kara Otjorata Onene, Noag Kangueehi, tja twirisirwe Otjombara yOvambanderu mOmongua. Okuyarukira po omuyaruke Ombara Sondoro Tjiroze.
Ngunda Orata Onene yOvambanderu Apoi Otniel Kavari nambano ke tji nokuuhara ama tjiukwa nao nungwari wa hukikirwe onguyu younongo womuhoko nu okuza mba ma tjiukwa otjOnongo yOmakuruhungi womuhoko wOvambanderu.
Tjingetjo ombura ndja zuko otjiwaṋa tja Vitoto tja zemburukire orutjindo rwatjo okuza motumbo okuyenda kOvitoto. Posi ya oyo ngari yomazemburukiro yemwe uriri worutjindo rwa Vitoto. Nge ha ri mozondi mbari tjimuna inga wa Pukiro wOvambanderu kourike wawo na ingi wOvambanderu nOvaherero pamwe ombura ndja zuko no wa Mongua wOvambanderu.