Auleria Wakudumo
Olupaka – Minista womauyelele nomakwatafano opaungoba Emma Theofelus okwa indila ovaNamibia, unene ovakulupe naavo hava di komikunda opo va xulife po okulongifa outoshe veengodi voo va hovele okulongifa eengodi dokomalungula.
Minista eshi okweshi holola pefimbo ta ningi omapekaapeko lomakwatafano pomukunda Olupaka moshitukulwa shaMusati, Theofelus okwa holola kutya epangelo otali longele kumwe nomahangano okuninga omakwatafano ngaashi Mobile Telecommunication Company (MTC) oshoyo oTelecom Namibia okuandjanekwa omakwafano moshilongo.
Theofelus okwa ti epangelo otali longele kumwe naMTC okupitila moproyeka yavo hai ifanwa Buffalo.
“Oungodi ovo hava ifanwa ‘outoshe’ ovawa shili shaashi ohava kwata onetwork nawa, ashike voo ova nhuninwa ashike okudenga nokutuma omatumwalaka nohava kwata ashike 2G ile o3G,” Minista ta fatulula ngaho.
Okwa ti itashi kwafele epangelo tali ende nokuyambula po omakwatafano mokutula o5G komatenda ashike ovanhu itava longifa eengodi odo hadi kwata onetwork oyo.
Oproyeka Buffalo, oya tulwa moilonga mu1 Oktoba 2025. Oproyeka ei oyili eudafano pokati kaMTC nepangelo okukwatakaneka nokunyonopaleka omakwatafano peenhele opo pehena ile pena onetwork tai shongola.
Omukulunhu waMTC koshikondo shokuandjaneka omakwatafano Ludwig Tjitandi okwa fatulula kutya oproyeka Buffalo inai nhuninwa okutunga omatenda onetwork ape, ashike oya nhuninwa okuwedela ko oikwatakanifi yonhumba komatenda oko opo omakwatafano a kale a nghonopala.
Okwa ti MTC okwa didilika kutya apa pehena onetwork ya wana, opena omatenda eli poushiinda. “Komatenda oko oko nee hatu ka tula omayaxa okukwatakaneka, a taalela ponhele opo pehena onetwork ponhele yokutunga etenda lipe,” Tjitandi ta holola ngaho. Tjitandi okwa fatulula kutya okutunga etenda limwe ohashi pula elongifo loshimaliwa shi hapu oshoyo okukwata efimbo lile. Minista okwa kwashilipalekela oshiwana shomomukunda waLupaka kutya epangelo inali va dimbwa novena okumona ekwafo.
“Ohatu ende nokutalela po omikunda ngaashi Olupaka opo tu tale notuude omaupyakadi ovakwashiwana opo tu kwashilipaleke kutya Ovanamibia aveshe ova kwatakanekwa,” Minista ta holola.
Eshi oshili oshikando shitivali Minista ta holoka pOlupaka okutala elunduluko lonetwork pomudingonoko. Theofelus okwa kufa yoo omhito ei opo a dungike oshiwana kombinga yovakengeleledi nookalyamupombo ovo luhapu hava longifa eengodi opo va kengelele oshiwana.
Okwa kunghilila oshiwana shi xulife po okuandja ouyelele kookalyamupombo kutya nava kale tava pula shike.
Minista okwa holola yoo kutya epangelo otali twikile okulonga naMTC oshoyo Telecom okupitila mwaasho hashi ifanwa oUniversal Service Fund opo va tule onetwork peefikola, poukilinika oshoyo peembelewa doikondo ya yooloka yepangelo.
Oproyeka Buffalo otai ka yambula po nokukwatanekwa Namibia alishe.