Auleria Wakudumo 

Ombelewa yomuprima woshilongo oye ya ponomola yotete eshi ya angata po epapa lovadani wela dingi moudano wovanailonga vepangelo wa unganekwa koshiputudilo shopombada shaUnam Etitano.

Oudano oo wa danenwa koshiputudilo shoUnam moWindhoek owa kwatela mo okutondoka, okuta owela oshoyo omaudano a kwao okuli kufa omadwanye. 

Oudano wowela owa hovela nedingonoko lopetamekoelela, omo oikondo ya yooloka okudja kouministeli wa yooloka ya kufa ombinga. 

Ova ninga omadingonoko, omo ovo va dengwa mo kuvakwao tava umo fiyo okedingoloko la xuuninwa. 

Mopaife, ovanhu ihava dana vali owela va taka omalambo okudanena pedu voo va dika eengolo medu. Ounyuni eshi tau ende nokulunduluka novanhu tava ende nokudilaandila omikalo dimwe okuxwepopaleka onghalamwenyo, owela paife ohau dulu okudanwa ovanhu veli ofika, tava kufa moulambo va ndulukwa moshinanena. 

Monalenale, ovanhu ovali yoo hava longifa unene omanghete okuta owela. Eshi nasho osha lunduluka novanhu ohava longifa oilongifomwa yopashinanena opo va te owela.  

Konima yokudenga eengudu adishe, ombelewa yomuprima oyeshi pondola okuuya ponomola yotete mowela. Nonande oudano owa li wa nhuninwa ehafo loku li kufa eengonyoto momaulu, ombelewa yomuprima oyali mbishi meumbo mwa tomwa mokufindana po oudano ou. 

Ovanambelewa vombelewa yomuprima, Hilma Kawela opamwe naJarius Kapembe ovo va tambula ko omapapa ponhele yombelewa yavo.

Owela ohau findwa unene omudani oo eshi omwaalu nokutula kumwe eenomola meendelelo. 

-wakudumoauleria@gmail.com