Auleria Wakudumo 

Ouministeli wounamapya nounaimuna, eeshi, omeva nomatalululo omadu owa holola kutya owa tuma oopombela oshoyo ovanambelewa vokuninga omapekaapeko koshitukulwa shaZambezi okulwifa oshipaxu osho sheli teyela moshitukulwa. 

Ouministeli owa shiivifa kutya owa didilika oshipaxu tashi ifanwa oAfrican Migratory Locusts osho sheli teyela momikunda 12 moshitukulwa shaZambezi. Omukulunhuwiliki mouministeli Ndiyapuki Nghituwamata okwa holola momukanda oo a pitifa kutya oshiapaxu osha didilikwa moItomba, Kasaya, Kabbe, Ngoma, Bukalo, Katima Mulilo, Masokotwani, Chichimani, Linyati, Sangwali, Ibbu nomomudingonoko waLake Liambezi. Oshipaxu otaku hokololwa tashi hanauna po oikunomwa yovanhu momapya. “Ovanambelewa otava kala koshitukulwa shaZambezi fiyo osheshi tava findi oshipaxu ile shama ngaho onghalo ya tip o xwepo,” Ndiyapuki ta holola ngaho. 

Ouministeli owa holola yo kutya oshipaxu oshe ya pefimbo lii, pefimbo opo vahapu ovo veli popepi noitenemba yomeva va tameka novamwe ova teelelwa va hovele okutameka moule wefimbo linini paife. 

Oshipaxu vati osha didilikwa tashi tuka nashimwe sha nambela tashi nhuka. Ovanafaalama otava indilwa opo va longele kumwe novanambelewa okudja kouministeli wounamapya op ova dule okupombela omapya avo okukeelela oshipaxu. 

“Ohatu indile yoo ovanafaalama oshoyo oshiwana koonono opo shi lopote oshipaxu ngeenge sha holola ponhele yonhumba meendelelo,” Ndiyapuki ta indile ngaho. 

Ouminsteli otau indile oikondo yepangelo, yopaumwene, omahangano amwe oshoyo ovakwashiwana opo veva waimine mokuyandja oikwafifo oyo tai dulu okulongifwa okufinda oshipaxu manga inashi li hanena neenhele dihapu. 

wakudumoauleria@gmail.com